सलमान खानच्या (Salman Khan) 'सिकंदर' (Sikandar) चित्रपटाचा काल (23 मार्च) ला ट्रेलर लाँच सोहळा मुंबईत पार पडला. या सोहळ्याला अनेक कलाकारांनी आणि चाहत्यांनी हजेरी लावली होती. साऊथ अभिनेत्री रश्मिका मंदाना (Rashmika Mandanna) पहिल्यांदा भाईजान सलमान खानसोबत काम करत आहे. 'सिकंदर'चा ट्रेलर पाहून चाहते चित्रपट पाहण्यासाठी खूपच आतुर झाले आहेत.

'सिकंदर' चित्रपटातील गाणी आणि ट्रेलरमधून सलमान खान आणि रश्मिका मंदान्ना यांची भन्नाट केमिस्ट्री पाहायला मिळत आहे. एकीकडे त्यांची केमिस्ट्री पाहून चाहते कौतुक करत आहेत. तर दुसरीकडे सलमान आणि रश्मिका यांच्या वयातील अंतरामुळे त्यांना ट्रोल करण्यात येत आहे.

सलमान खान 59 वर्षांचा आहे. तर रश्मिका मंदान्ना 28 वर्षांची आहे. दोघांच्या वयात जवळपास 31 वर्षांचे अंतर आहे. या संदर्भात सलमान खान ट्रेलर लाँच वेळी म्हणाला की, "हिरोईन आणि माझ्या वयात 31 वर्षांचा फरक आहे. पण जेव्हा हिरोईनला काही प्रॉब्लेम नसतो हिरोईनच्या वडिलांना काही त्रास नसतो. तर तुम्हाला काय प्रॉब्लेम आहे? जेव्हा तिचे लग्न होईल आणि तिला मुलं होतील तेव्हा त्यांच्यासोबतही काम करणार. आईची परवानगी मिळेलच."

'सिकंदर' चित्रपटामध्ये सलमान, रश्मिकासोबतच काजल अग्रवाल, शर्मन जोशी, प्रतीक बब्बर आणि सत्यराज हे कलाकार पाहायला मिळणार आहेत. 'सिकंदर' 30 मार्चला गुढीपाडव्याला रिलीज होणार आहे. तर सोमवारी 31 मार्चला ईद साजरी केली जाणार आहे.'सिकंदर' चित्रपटाचे दिग्दर्शन एआर मुरुगादास यांनी केले आहे. चित्रपटात सलमान खानचा ॲक्शन मोड पाहायला मिळत आहे.