Shefali jariwala dies: बिग बॉस १३ फेम आणि काँटा लगा गर्ल म्हणून प्रसिद्ध असलेली अभिनेत्री शेफाली जरीवाला हिचं ४२ व्या वर्षी निधन झालं. हृदयविकाराच्या झटक्यानं तिचा मृत्यू झाल्याचं सांगण्यात येत आहे. याबाबत तिच्या कुटुंबीयांकडून कोणतीही अधिकृत माहिती देण्यात आली नाही.

बिग बॉस १३ ची स्पर्धक आणि काँटा लगा फेम अभिनेत्री शेफाली जरीवाला हिच्या निधनानं फिल्म आणि टीव्ही इंडस्ट्रीवर शोककळा पसरली आहे. रिपोर्ट्सनुसार, २७ जून रोजी रात्री शेफालीच्या छातीत अचानक दुखू लागलं. तिचा पती पराग त्यागी आणि अन्य जवळच्या तीन जणांनी तिला तात्काळ मुंबईतील अंधेरी परिसरातील एका रुग्णालयात नेलं. तिथं डॉक्टरांनी तपासणी केली असता मृत घोषित करण्यात आलं.

टाइम्स ऑफ इंडियाच्या रिपोर्टनुसार, रुग्णालयातील स्टाफनं या दुःखद वृत्ताला दुजोरा दिला आहे. शेफाली जरीवालाच्या निधनानं तिचे चाहते आणि मनोरंजनसृष्टीवर शोककळा पसरली आहे. सोशल मीडियावर तिच्या आठवणींना उजाळा दिला जात असून, चाहत्यांकडून श्रद्धांजली वाहण्यात येत आहे.

सेलिब्रिटींकडून श्रद्धांजली

अली गोनी, राजीव अदातिया आणि अन्य सेलिब्रिटींनी सोशल मीडियावर शोक व्यक्त केला. अली गोनी यानं पोस्टद्वारे शेफालीला श्रद्धांजली वाहिली आहे. राजीव अदातिया यानंही श्रद्धांजली वाहिली आहे. ही घटना खूपच धक्कादायक आहे, अत्यंत दुःखद अशी प्रतिक्रिया त्यानं दिली आहे.

'काँटा लगा'द्वारे चमकली होती शेफाली

शेफाली जरीवाला २००२ मध्ये आलेल्या सुपरहिट काँटा लगा या गाण्याच्या माध्यमातून रातोरात स्टार झाली होती. त्यानंतर तिनं मुझसे शादी करोगी यांसारखे चित्रपट आणि अनेक म्युझिक अल्बममधून काम केलं आहे. टीव्हीवर नच बलिए ५ आणि बिग बॉस ३ यांसारख्या रिअॅलिटी शोमध्ये सहभाग घेतला होता.