बॉलिवूडवर संकटाचे सावट पाहायला मिळत आहे. एका मागोमाग एक बॉलिवूड सेलिब्रेटींना बिश्नोई गँगकडून धमकी येताना दिसत आहे. रोहित शेट्टी, रणवीर सिंगनंतर सलमान खानच्या आणखी एका जवळच्या व्यक्तीला जीवे मारण्याची धमकी आली आहे. सलमान खानचा मेहुणा आयुष शर्माचा जीवे देखील धोक्यात आहे. आयुष शर्माला देखील बिश्नोई गँगकडून धमकी मिळाल्याची माहिती समोर आली आहे. नेमकं प्रकरण काय, जाणून घेऊयात.

मीडिया रिपोर्टनुसार, सलमान खानचा मेहुणा आयुष शर्मा याला धमकीचा ईमेल आला आहे. हा ईमेल लॉरेन्स बिश्नोई टोळीचा असल्याची माहिती मिळाली आहे. आयएएनएसच्या वृत्तानुसार, मुंबई गुन्हे शाखेने बुधवारी सांगितले की, आयुषला धमकीचा ईमेल मिळाला होता आणि पाठवणाऱ्याने लॉरेन्स बिश्नोई टोळीशी संबंधित असल्याचा दावा केला आहे. आयुष शर्माला लॉरेन्स बिश्नोई टोळीकडून प्रोटॉन मेलद्वारे धमकीचा ईमेल मिळाला होता. मुंबई पोलीस या प्रकरणाचा तपास घेत आहेत.

सलमान खानच्या घराबाहेर गोळीबार

सलमान खानला यापूर्वी देखील लॉरेंस बिश्नोई गँग कडून जीवे मारण्याच्या धमक्या मिळाल्या आहेत. 2024 मध्ये सलमान खानच्या गॅलेक्सी अपार्टमेंट बाहेर गोळ्या झाडण्यात आल्या होत्या. पोलीस आता या प्रकरणाची सविस्तर चौकशी करत आहे. तसेच पुरावे शोधत आहे. मनोरंजन क्षेत्रातील दिग्गजांना वारंवार धमक्या मिळत असल्यामुळे फिल्मी जगतात खळबळ उडाली आहे.

काही दिवसांपूर्वीच बॉलिवूडचे प्रसिद्ध दिग्दर्शक रोहित शेट्टी यांच्या जुहू येथील निवासस्थानावर देखील लॉरेन्स बिश्नोई टोळीकडून गोळीबार झाला होता. तसेच त्यानंतर रणवीर सिंगला देखील बिश्नोई गँगकडून धमकी आल्याची माहिती मिळाली आहे. रणवीर सिंगला कोट्यवधी रुपयांची मागणी करणारा धमकीचा मेसेज आल्याची माहिती मिळाली आहे. मीडिया रिपोर्टनुसार, ही धमकी व्हॉट्सअॅपवर व्हॉइस नोटद्वारे पाठवण्यात आली होती. पोलीसांनी सलमान खान, रणवीर सिंग, रोहित शेट्टी आणि आयुष शर्मा यांची सुरक्षितता वाढवली आहे.