Jr NTR Spoke About RRR Movie: एसएस राजामौली दिग्दर्शित 'आरआरआर' या चित्रपटाची सध्या खूप चर्चा आहे. गोल्डन ग्लोब अवॉर्ड्समध्ये 'नाटू-नाटू'ने सर्वोत्कृष्ट ओरिजनल गाण्याच्या कॅटेगरीत पुरस्कार पटकावला आहे. तेव्हापासून सगळीकडे 'आरआरआर' आणि 'नाटु-नाटु'ची चर्चा होत आहे.

'आरआरआर' संपूर्ण टीम आणि चित्रपटातील मुख्य कलाकार ज्युनियर एनटीआर आणि राम चरण खूपच आनंदी आहेत. पुरस्कार जिंकल्यानंतर एका मुलाखतीत ज्युनियर एनटीआरने सांगितले की, 'आरआरआर'ला पाश्चात्य देशांमध्ये खूप पाठिंबा मिळत आहे. या चित्रपटाला भारतापेक्षा जपानमध्ये जास्त प्रेम मिळाल्याचेही त्याने म्हटले आहे.

ज्युनियर एनटीआरने 'नाटू-नाटू'साठी पुरस्कार जिंकल्यानंतर मुलाखत दिली. या मुलाखतीदरम्यान ज्युनियर एनटीआरने जगभरातील प्रतिक्रियांबद्दल मत व्यक्त केले आहे. 'आरआरआर' चित्रपटाला भारतापेक्षा जपानमध्ये जास्त प्रेम मिळाल्याचे त्याने येथे सांगितले. ज्युनियर एनटीआर म्हणाला, 'मी जपानमध्ये होतो आणि तिथे मी लोकांना रडताना पाहिले. प्रेक्षक म्हणून त्यांनी या चित्रपटाला खूप प्रेम दिले आहे, असे मला वाटते. हे भारतात मिळालेल्या प्रेमापेक्षा खूप जास्त होते.'

ज्युनियर एनटीआरने मुलाखतीत सांगितले की, 'आधी आम्हाला वाटले की प्रमोशन फक्त सोशल मीडियावर होत आहे आणि फक्त भारतीय किंवा आमचे मित्रच चित्रपट पाहणार आहेत. पण तसे नव्हते. लोकांचं चित्रपटाबद्दलचं प्रेम वाढतच गेलं, जे पाहून आम्हाला वाटलं की या चित्रपटाची क्रेझ खूप आहे.

'आरआरआर'ने जपानमध्ये उत्तम कामगिरी केले आहे. एसएस राजामौली यांचा चित्रपट जपानमधील सर्वात मोठा ओपनिंग चित्रपट ठरला आहे. पहिल्या वीकेंडमध्येच चित्रपटाने 35 मिलियन येन कमावले. चित्रपटाचे एकूण कॅलेक्शन 403 दशलक्ष येन आहे. यावरून जपानमधील 'आरआरआर'ची क्रेझ दिसून देते.