Rohit Shetty House Firing Case: बॉलीवूड दिग्दर्शक रोहित शेट्टीच्या घरावर झालेल्या गोळीबार प्रकरणात पुणे पोलिसांनी धडाकेबाज कारवाई करत पाच संशयितांना ताब्यात घेतले असून या प्रकरणाला मोठे वळण मिळाले आहे. या प्रकरणात पाच संशयितांना ताब्यात घेतल्या नंतर आता पोलिसांना या प्रकरणाचा सीसीटीव्ही व्हिडिओ मिळाला आहे.

संशयितांची नावे

पुण्यातील वारजे पोलिसांनी केलेल्या कारवाईनंतर ताब्यात घेतलेल्या संशयितांची नावे आता समोर आली आहेत. अमान मोरोटे (२७), आदित्य गायकी (१९), सिद्धार्थ येनपुरे (२०), समर्थ पोमाजी (१८) आणि स्वप्नील सकट (२३) अशी ताब्यात घेतलेल्या पाचही संशयितांची नावे आहेत. सूत्रांनी दिलेल्या माहितीनुसार, या पाच जणांपैकी चार संशयितांना घेऊन मुंबई पोलिसांचे पथक पुण्यातून मुंबईच्या दिशेने रवाना झाले आहे. उर्वरित पाचव्या आरोपीलाही थोड्याच वेळात मुंबई क्राइम ब्रँचकडे सोपवण्यात येणार असल्याची माहिती आहे. रोहित शेट्टी यांच्या घरावर झालेल्या गोळीबार प्रकरणाचा तपास आता मुंबई गुन्हे शाखेकडून सुरू आहे.

'सुपारी' दिली होती का?

पोलिस तपासात ताब्यात घेतलेले पाचही संशयित देशातील कुख्यात गँगशी संबंधित असल्याची प्राथमिक माहिती समोर आली आहे. या गँगचे नेटवर्क पुणे, मुंबईसह इतर राज्यांमध्ये पसरले असल्याचा संशय पोलिस व्यक्त करत आहेत. या प्रकरणात गोळीबार करण्यासाठी कोणीतरी 'सुपारी' दिली होती का, तसेच हल्ल्यामागील नेमके कारण काय होते, याचा सखोल तपास सध्या सुरू आहे.

सीसीटीव्ही फुटेज समोर

रोहित शेट्टीच्या घरावर झालेल्या गोळीबार प्रकरणातील सीसीटीव्ही फुटेज समोर आले असून या घटनेबाबत महत्त्वाची माहिती उघड झाली आहे. समोर आलेल्या सीसीटीव्ही व्हिडिओमध्ये एक तरुण रोहित शेट्टी यांच्या घरासमोर असलेल्या चौकातून इमारतीच्या दिशेने गोळीबार करताना स्पष्टपणे दिसून येतो.

आणखी खुलासे होण्याची शक्यता

फुटेजमध्ये तरुण काही वेळ थांबून नंतर गोळीबार करत असल्याचे दिसत आहे. गोळीबारानंतर हा तरुण बाईकवर बसून घटनास्थळावरून फरार झाल्याचेही सीसीटीव्हीत स्पष्ट झाले आहे. सीसीटीव्ही फुटेजच्या आधारे पोलिसांनी तपासाला वेग आला असून हल्लेखोराची ओळख पटवण्यासाठी तांत्रिक तपास सुरू आहे. या फुटेजमुळे गोळीबार कसा आणि कोणत्या दिशेने झाला, याचा अंदाज पोलिसांना मिळत आहे. लवकरच या प्रकरणात आणखी खुलासे होण्याची शक्यता वर्तवली आहे.