Bollywood Stories: अब्बास-मस्तान यांनी दिग्दर्शित केलेला आणि सलमान खान, प्रीती झिंटा व राणी मुखर्जी यांची प्रमुख भूमिका असलेला २००१ मधील रोमँटिक ड्रामा चित्रपट चोरी चोरी चुपके चुपके हा बॉलीवूडमध्ये 'सरोगसी' या विषयावरील एक पथदर्शी चित्रपट म्हणून अनेकदा ओळखला जातो. पण, हा चित्रपट केवळ त्याच्या कथानकापुरता मर्यादित न राहता, हा चित्रपट मुंबईच्या 'अंडरवर्ल्ड'शी असलेल्या संबंधांमुळेही कुप्रसिद्ध ठरला; असा एक संबंध ज्याची सुरुवातीला या चित्रपटाचे अर्थपुरवठादार (फायनान्सर) भारत शाह यांना काहीच कल्पना नव्हती. या घटनांची उजळणी करताना, चित्रपट निर्माते राम गोपाल वर्मा यांनी हा प्रकल्प नेमका कसा साकार झाला, याचा किस्सा सांगितला.

हुसेन झैदी यांच्याशी झालेल्या संभाषणादरम्यान, राम गोपाल वर्मा यांनी एक धक्कादायक किस्सा सांगितला. त्यांच्या मते, चित्रपटाचे फायनान्सर भारत शाह यांना सुरुवातीला या प्रकल्पामागील अंडरवर्ल्ड कनेक्शनची कल्पना नव्हती. एका अनोळखी व्यक्तीने सलमान खानच्या तारखा मिळत असल्याचा दावा करताच शाह यांनी थेट सलमान खान यांच्याशी संपर्क साधला. सलमानने याची खात्री दिल्यानंतर चित्रपटासाठी निधी देण्यात आला आणि चित्रीकरण सुरू झाले.

नंतर मात्र परिस्थिती गंभीर झाली, जेव्हा चित्रपटाचे निर्माता नाझिम रिझवी यांचे अंडरवर्ल्ड डॉन छोटा शकील यांच्याशी संबंध असल्याचे समोर आले. वर्मा यांच्या मते, शाह यांनी सुरुवातीला याकडे दुर्लक्ष केले, कारण ते स्वतः कायदेशीर व्यवसाय करत असल्याचा त्यांचा विश्वास होता. दरम्यान, एका व्यावसायिकाला 5 कोटी रुपयांच्या खंडणीचा फोन आला आणि त्याने मदतीसाठी शाह यांच्याकडे धाव घेतली. रिझवीच्या संपर्कांचा उपयोग करून ही रक्कम चर्चेनंतर 2 कोटींवर आणण्यात आली. मात्र, या संपूर्ण व्यवहारावर पोलिसांनी लक्ष ठेवले होते आणि फोन टॅपिंगद्वारे तपास सुरू होता.

2001 मध्ये मुंबई पोलिसांनी शाह आणि रिझवी यांना अटक केली. रिझवीने अंडरवर्ल्डशी संबंध लपवले असल्याच्या आरोपावरून शाह यांना दोषी ठरवण्यात आले आणि एक वर्षाची शिक्षा सुनावण्यात आली. त्यांनी आधीच 14 महिने कोठडीत घालवले असल्याने त्यांची सुटका झाली. दुसरीकडे, रिझवी आणि त्याचा साथीदार अब्दुल रहीम अल्लाबक्ष खान यांना सहा वर्षांची शिक्षा आणि दंड ठोठावण्यात आला. या प्रकरणामुळे ‘चोरी चोरी चुपके चुपके’ हा चित्रपट केवळ कथानकामुळेच नव्हे, तर अंडरवर्ल्ड कनेक्शनमुळेही बॉलिवूडच्या लक्षात राहिला.