Rakhi Sawant : बिग बॉस मराठीतील टॉप ५ मधील असलेली स्पर्धक राखी सावंत सध्या बरीच चर्चेत आहे. बिग बॉसच्या घरातून ९ लाख रुपये जिंकून पाचव्या स्थानावर समाधान मानत एक्झिट घेतली. बिग बॉसच्या घरातून बाहेर येताच तिने आपल्या आईच्या आजाराबद्दल महत्वपूर्ण माहिती दिली. तिने सोशल मीडियावरून आपल्या आईच्या उपचारासाठी मदत करावी अशी विनंती केली होती.

राखीची आई सध्या एका गंभीर आजाराचा सामना करत असून रुग्णालयात तिच्या आईवर उपचार सुरू आहेत. परंतु, आईच्या उपचाराचा खर्च खूपच जास्त असल्याचे सांगत राखीने मदतीसाठी आवाहन केलं होतं. त्यानंतर आता तिच्या मदतीला उद्योगपती मुकेश अंबानी धावून आले आहेत. विरल भय्यानी या सोशल मीडियावरील पेजने राखीचा व्हिडीओ शेअर करत माहिती दिली आहे.

विरल भय्यानीने व्हिडिओ त्यांच्या सोशल मीडियावर शेअर केला आहे. या शेअर केलेल्या व्हिडिओत राखीने मुकेश अंबानींचे आभार मानले आहेत. सोबतच ती या व्हिडिओत म्हणते, “माझी आई आजारपणामुळे कोणाला ओळखतही नाही. तिला आम्ही दोन महिन्यांसाठी क्रिटीकेअर रुग्णालयात दाखल करत आहोत. या रुग्णालयाची फी अंबानींमुळे थोडी कमी करण्यात आली आहे. मला मदत केली त्याबाबत मी अंबानींचे आभार मानते.”

नुकतेच राखीने पती आदिलसोबत प्रेमविवाह करत नव्या आयुष्याची सुरुवात केली. राखीने मे महिन्यात कोर्ट मॅरेज केले होते. जरी तिने आता नव्या आयुष्याला सुरुवात केली असली तरी त्या दोघांनी सात महिन्यापूर्वीच लग्न केले असल्याचे समोर आले आहे.