मनोरंजनसृष्टीतून धक्कादायक बातमी समोर आली आहे. मराठी अभिनेत्री प्रिया मराठे यांचे कर्करोगाशी झुंज देत असताना निधन झाले आहे. त्यांच्या निधनाने मराठी आणि हिंदी मनोरंजनसृष्टीवर शोककळा पसरली आहे. प्रिया मराठे यांनी आजवर अनेक मराठी आणि हिंदी मालिकांमधून प्रेक्षकांचे मनोरंजन केले. आजारपणामुळे अभिनेत्री प्रिया मराठे या सोशल मीडियापासून थोड्या दूर होत्या. त्यांची शेवटची पोस्ट पाहूया.

प्रिया मराठे यांची शेवटची पोस्ट

प्रिया मराठे (Priya Marathe) यांनी शेवटची पोस्ट 11 ऑगस्ट 2024ला केली होती. त्यांनी नवऱ्यासोबतच्या पिकनिकचे फोटो शेअर केले होते. प्रिया मराठे आणि शंतनू मोघे (Shantanu Moghe) हे दोघेही जयपूरला फिरायला गेले होते. तेव्हा आमेर किल्ल्यावर काढलेले फोटो प्रिया मराठे यांनी शेअर केले होते.

"किल्ल्याची विशालता आणि त्यातील गुंतागुंत पाहून थक्क झालो..." असे कॅप्शन त्यांनी फोटोंना दिले. प्रिया मराठे यांनी शेअर केलेल्या फोटोंमध्ये त्या नवऱ्यासोबत निवांत वेळ घालवताना दिसत आहे. निसर्गाच्या सानिध्यात नवऱ्यासोबतचे सुंदर फोटो त्यांनी शेअर केले होते. प्रिया आणि शंतनू दोघेही एकत्र खूप आनंदात दिसत होते.

प्रिया मराठे वैयक्तिक आयुष्य

प्रिया मराठे यांनी 2012 साली अभिनेते शंतनू मोघेशी लग्नगाठ बांधली. प्रिया मराठे यांचा जन्म 23 एप्रिल 1987 रोजी ठाण्यात झाला होता. प्रिया मराठे आणि शंतनू मोघेशे हे मराठी इंडस्ट्रीतील लोकप्रिय जोडी होती.

प्रिया मराठे यांचे करिअर

प्रिया मराठे यांनी 'या सुखांनो या' मालिकेतून मराठी मालिकाविश्वात पदार्पण केले. तर 'कसम से' मालिकेतून हिंदी टेलिव्हिजन क्षेत्रात पाऊल ठेवले. 'पवित्र रिश्ता', 'या सुखांनो या', 'बडे अच्छे लगते हैं', 'तू भेटशी नव्याने', 'साथ निभाना साथिया', 'चार दिवस सासूचे', 'तू तिथे मी', 'तुझेच मी गीत गात आहे' अशा अनेक गाजलेल्या मालिका त्यांनी केल्या आहेत.