संजय गडदे

Mumbai News: गेल्या काही दिवसांपूर्वी ‘72 Hoorain’चा ट्रेलर प्रदर्शित करण्यात आला आहे. ट्रेलर प्रदर्शित होताच वादाच्या भोवऱ्यात अडकलेल्या चित्रपटाच्या निर्मात्यांनी दिल्लीतील जवाहरलाल नेहरू विद्यापीठात स्पेशल स्क्रिनिंग करण्याचा निर्णय घेतला. याचदरम्यान, आता या चित्रपटाच्या निर्मात्यांविरोधात मुंबईत पोलीस ठाण्यात तक्रार दाखल करण्यात आली आहे. (Latest Marathi News)

'72 हुरें' सिनेमा सध्या चर्चेत आहे. येत्या शुक्रवारी, ७ जुलै रोजी हा चित्रपट मोठ्या पडद्यावर प्रदर्शित होणार आहे. टीझर आणि ट्रेलर प्रदर्शित झाल्यापासून हा चित्रपट वादात सापडला आहे. या चित्रपट निर्मात्यांविरोधात मुंबईच्या गोरेगाव पोलीस ठाण्यात तक्रार दाखल करण्यात आली आहे.

सय्यद अरिफली महम्मदली नावाच्या व्यक्तीने गोरेगाव पोलीस ठाण्यात चित्रपट निर्मात्यांविरोधात तक्रार दाखल केली आहे. या चित्रपटामुळे मुस्लिम समाजाची प्रतिमा मलीन होत असल्याचे सय्यद अरिफली महम्मदली याने आपल्या तक्रारीत म्हटले आहे.

सय्यद अरिफली महम्मदली नावाच्या व्यक्तीने मुंबईतील गोरेगाव पोलीस ठाण्यात चित्रपट निर्मात्यांविरोधात तक्रार दाखल केली आहे. '72 हुरें'चे दिग्दर्शन राष्ट्रीय पुरस्कार विजेते संजय पूरण सिंग चौहान यांनी केले आहे. तर अशोक पंडित या चित्रपटाचे सहनिर्माते आहेत.

आपल्या तक्रारीत सय्यद अरिफली महम्मदलीने म्हटले आहे की, '72 हुरें' चित्रपटाने आपल्या धर्माचा अपमान केला आहे. हा चित्रपट जातीय भेदभाव आणि द्वेषाला प्रोत्साहन देतो. या चित्रपटामुळे लोकांमध्ये मुस्लिम समाजाची प्रतिमा मलीन होईल. दरम्यान, '72 हुरें' सिनेमाच्या विरोधात तक्रार दाखल केल्यानंतर काय कारवाई होते, हे पाहावे लागणार आहे.

काश्मीरमधील राजकीय पक्षाने घेतला आक्षेप

दरम्यान, काश्मीरमधील काही राजकीय पक्षांनी 72 हुरें चित्रपटावर आक्षेप घेतला आहे. काश्मीरमधील राजकीय पक्षाने चित्रपटात दाखवलेल्या दहशतवाद्यांच्या मानसिक छळाच्या दृश्यांवर तीव्र आक्षेप घेतला आहे.

चित्रपटात मांडलेल्या नकारात्मक गोष्टींमुळे विशिष्ट धर्माबद्दल लोकांमध्ये चुकीचा संदेश जाईल. त्याचबरोबर समाजावर विपरित परिणाम होईल , असे या राजकीय पक्षांचे मत आहे.