सध्या 'पंचायत ३' (Panchayat 3) वेब सीरिजची सोशल मीडियावर तुफान चर्चा सुरू आहे. गेल्या अनेक दिवसांपासून प्रेक्षक या सीरीजची उत्सुकतेने वाट बघत होते. नुकतीच ही सीरिज ॲमेझॉन प्राईम व्हिडीओवर रिलीज झाली आहे. सीरजमध्ये प्रल्हाद ही भूमिका अभिनेता फैजल मलिक (faisal malik) याने साकारली आहे. नुकतंच अभिनेत्याने टिव्ही ९ भारतवर्षला मुलाखत दिली. या मुलाखतीत त्याने अनेक वेगवेगळ्या मुद्द्यांवर भाष्य केले आहे. मुलाखतीत अभिनेत्याने कंगना रणौतच्या राजकारणातील प्रवेशावर भाष्य केले आहे.

फैजल मलिकने कंगना रणौतसौबत 'रिवॉल्वर रानी' चित्रपटामध्ये काम केले आहे. तर त्याने मुलाखतीमध्ये, शुटिंगबद्दलचा किस्सा शेअर केलेला आहे. कंगनाबद्दल बोलताना अभिनेता फैजल मलिक म्हणाला, "कंगना रणौत एक उत्तम महिला आहे. पूर्वी ती अश नव्हती वागत. आता असं वाटतंय की, तिच्या ऐवजी दुसरंच कोण तरी असं वागत आहे. माझ्या अंदाजे, सेलिब्रिटींचं काम हे अभिनय करणं आहे, त्यांनी अभिनयच करावा. बाकी इतर गोष्टींचा त्यांनी विचार करु नये. तिची बहिण आणि मी एकमेकांना खूप चांगले ओळखतो. रंगोली रणौतनेही माझ्यासोबत काही चित्रपटांत काम केलेले आहे. आम्ही दोघंही दीड वर्षे एकाच ऑफिसमध्ये होतो."

यावेळी अभिनेत्याने कंगनाच्या अभिनयाचेही कौतुक केले. फैजल मुलाखतीत म्हणाला, "कंगना सारखा अभिनय कोणीही करु शकत नाही. कंगनाकडे स्वत:चे कौशल्य गुण आहेत. पण गेल्या काही दिवसांमध्ये नेमकं तिला काय झालं आहे, हे माहित नाही. मला वाटते की अभिनेत्याने खूप मेहनतीने शिकलेल्या गोष्टींवर लक्ष केंद्रित केले पाहिजे." फैजल पुढे म्हणाला की, कंगनाने अभिनय सोडू नये, अभिनय सोडणं चुकीचं आहे. तिने अभिनयासाठी आणखी काम करावं.

सध्या अनेक सेलिब्रिटी राजकारणात प्रवेश करीत आहेत, यावर त्याने आपले परखड मत मांडले आहे. तो म्हणाला, "सेलिब्रिटींनी राजकारणात प्रवेश करू नये. कारण राजकारण करण्याचं काम हे राजकारण्यांचंच असतं. जर तुम्ही समाजासाठी काही करु इच्छित आहात, तर खासदार बनून संसदेत जा. लोकप्रतिनिधी बनून लोकांची सेवा करा. माझ्या अंदाजे राजकारण हे असे काम आहे, जे तुम्हाला वर्षाचे ३६५ दिवस ॲक्टिव्ह राहून काम करावे लागते. राजकारण्याच्या नोकरीत तुम्हाला २४ X ७ काम करावे लागते. राजकारणी बनण्याची गरज कोणत्या सेलिब्रिटीचं नाही तर, कोणत्या तरी कार्यकर्त्याचं आहे. मला वाटतं ज्याचं त्याचं काम ज्याने त्यानेच करावे. "