आपल्या चमकदार अभिनयाने जगभरात नाव कमाविणारे ज्येष्ठ हिंदी चित्रपट अभिनेते दिलीप कुमार यांचे आज सकाळी निधन झाले. ते 98 वर्षांचे होते. आयुष्याच्या शेवटच्या दिवसांत दिलीप कुमार आजारी पडले होते. नुकतचं श्वासोच्छवासाच्या समस्येमुळे आणि वयाशी संबंधित आजारांमुळे त्यांना मुंबईतील हिंदुजा रुग्णालयात दाखल करण्यात आले होते.

दिलीपकुमार यांच्या निधनामुळे केवळ भारतातच नव्हे तर शेजारच्या पाकिस्तानमध्येही शोकांचे वातावरण आहे. त्यांचा जन्म पाकिस्तानच्या खैबर पख्तूनख्वा प्रांतात झाला होता. त्याचबरोबर पाकिस्तानच्या राजकीय आणि चित्रपटातील व्यक्तिमत्त्व्यांनी त्यांच्या मृत्यूवर शोक व्यक्त केला आहे आणि सोशल मीडियावर त्यांचे स्मरण करून त्यांना श्रद्धांजलीही वाहिली आहे. पाकिस्तानचे राष्ट्रपती ते पंतप्रधान यांनी दिलीप कुमार यांना श्रद्धांजली वाहिली.

पाकिस्तानचे राष्ट्रपती डॉ.आरिफ अल्वी यांनी सोशल मीडियावर दिलीप कुमार यांच्याबद्दल शोक व्यक्त केला आहे. त्यांनी आपल्या अधिकृत ट्विटर अकाउंटवर लिहिले की, ''दिलीपकुमार (युसुफ खान) निघून गेल्याने मला वाईट वाटत आहे. एक हुशार अभिनेता, एक नम्र माणूस आणि एक विशेष व्यक्तिमत्व. त्यांच्या कुटुंबीयांना आणि चाहत्यांना सहानुभूती त्याचा आत्म शांती लाभो''.

दिलीप कुमार यांच्या निधनाबद्दल पाकिस्तानचे पंतप्रधान इम्रान खान यांनी शोक व्यक्त केला आहे आणि श्रद्धांजली वाहिली आहे. त्यांच्या उदारपणाचा आणि औदार्याचा उल्लेख करत इम्रान खान यांनी ट्विट केले. पाकिस्ताच्या पंतप्रधानांनी आपल्या अधिकृत ट्विटर हँडलवर लिहिले की, ''दिलीप कुमार माझ्या पिढीसाठी एक उत्तम अभिनेता होते. त्यांच्या निधनाची बातमी ऐकून वाईट वाटले. या अभिनेत्याने कर्करोगाच्या रुग्णालयासाठी सुरू केलेल्या प्रकल्पाचा निधी उभारण्यासाठी आपला मौल्यवान वेळ काढला होता हे मी कधीही विसरणार नाही''.

पाकिस्तान मुस्लिम लीग चे अध्यक्ष शाहबाज शरीफ यांनी दिलीपकुमार यांना श्रद्धांजली वाहताना ट्विटरवर लिहिले आहे की पेशावरच्या युसुफ खानने बॉलिवूडवर दिलीपकुमार म्हणून बरीच वर्षे राज्य केले आणि आज तो एक लेजेंड म्हणून जग सोडून गेले. पाकिस्तानचे गृहमंत्री शेख रशीद अहमद यांनी ट्विटरवर दिलीपकुमार यांची आठवण काढली आहे. त्यांनी अभिनेत्याबरोबर झालेल्या भेटींची आठवण करुन दिली आणि त्यांचे आकर्षक व्यक्तिमत्त्वाचा माणूस म्हणून वर्णन केले.

Edited By: Pravin Dhamale