जान्हवी कपूर आणि राजकुमार राव स्टारर ‘मिस्टर अँड मिसेज माही’ चित्रपट ३१ मे रोजी थिएटरमध्ये बॉक्स ऑफिसवर प्रदर्शित झाला आहे. रिलीजच्या पहिल्या दिवसापासून चित्रपटाला प्रेक्षकांकडून चांगला प्रतिसाद मिळत आहे. पण दुसऱ्या दिवशी चित्रपटाला प्रेक्षकांकडून संमिश्र प्रतिसाद मिळाला आहे. चित्रपटाला दुसऱ्या दिवशी म्हणावा तसा प्रतिसाद मिळालेला नाही, जाणून घेऊया दुसऱ्या दिवसाच्या कमाईबद्दल.

क्रिकेट आणि रोमान्सचे ट्विस्ट असलेल्या या चित्रपटाची प्रेक्षक आतुरतेने वाट पाहत होते. अखेर हा चित्रपट थिएटरमध्ये रिलीज झालेला आहे. चित्रपटाला पहिल्या दिवशी सकारात्मक प्रतिसाद मिळालेला असून दुसऱ्या दिवशी म्हणजेच शनिवारी संमिश्र प्रतिसाद मिळालेला आहे. पहिल्या दिवशी ७ कोटींची कमाई केली असून दुसऱ्या दिवशी या चित्रपटाने ४ कोटींच्या आसपासची कमाई केलेली आहे. ४० कोटींच्या बजेटमध्ये तयार झालेला हा चित्रपट येत्या रविवारी म्हणजेच विकेंडला किती कोटींची कमाई करणार, हे पाहणं औत्सुक्याचे ठरणार आहे.

'मिस्टर अँड मिसेस माही'चे दिग्दर्शन शरण शर्मा यांनी केले आहे. चित्रपटाच्या कथेत क्रिकेटवर प्रेम करणाऱ्या कपलची स्टोरी दाखवली आहे. हा चित्रपट एक अयशस्वी क्रिकेटर आपल्या पत्नीला तिची स्वप्ने पूर्ण करण्यास कशी मदत करतो यावर आधारित आहे. राजकुमार राव आणि जान्हवी कपूरसह प्रमुख भूमिकेत कुमुद मिश्रा, अभिषेक बॅनर्जी, जरीना वहाब आणि राजेश शर्मा सारखे अनेक कलाकार आहेत.