Rani Mukerji Controversy: प्रसिद्ध बॉलीवूड अभिनेत्री राणी मुखर्जी सध्या तिच्या आगामी 'मर्दानी ३' चित्रपटामुळे चर्चेत आहे. ती सध्या या चित्रपटाच्या प्रमोशनमध्ये व्यस्त आहे. नुकत्याच एका मुलाखतीत तिने केलेल्या विधानामुळे तिला सोशल मीडियावर ट्रोलिंगचा सामना करावा लागत आहे. राणीने पती-पत्नीमधील नात्याबद्दल भाष्य केले. तिचा हा व्हिडिओ वेगाने व्हायरल होत आहे आणि बरेच लोक तिला ट्रोल करताना दिसत आहेत.

राणी मुखर्जी एका मुलाखतीदरम्यान म्हणाली, "माझा असा विश्वास आहे की आदर घरापासून सुरू होतो, अगदी सहजपणे. जेव्हा एखादा मुलगा त्याच्या आईसोबत झालेली वाईट वागणूक पाहतो तेव्हा तो विचार करू लागतो की जर त्याच्या आईसोबत असे घडत असेल तर प्रत्येक मुलीशी असेच वागता येईल."

वाद कशामुळे सुरु झाला?

राणी म्हणाली, "मला वाटते की वडील त्यांच्या पत्नींशी कसे वागतात यामुळे मुलंपण तसेच होत जातात. जर त्यांच्या आईंना चांगले आणि आदराने वागवले गेले तर मुलांना समजते की मुलींचा आदर केला पाहिजे आणि समाजात त्यांचे स्थान असले पाहिजे." ती पुढे म्हणाली, "म्हणून हे सर्व घरापासून सुरू होते. वडील आपल्या बायकोवर ओरडू नये. पण, आईने वडिलांवर ओरडले पाहिजे." अनेकांना हे विधान आवडले नाही.

सोशल मीडियावर नेटकरी काय म्हणाले?

राणीची ही क्लिप व्हायरल होत आहे. विविध सोशल मीडिया प्लॅटफॉर्मवर लोक त्यावर प्रतिक्रिया देत आहेत. एका नेटकऱ्याने लिहिले, "मला वाटते की ती मस्करीत बोलण्याचा प्रयत्न करत आहे" दुसऱ्याने लिहिले, "कोणीही कोणाला का ओरडावे? आपण शांततेने बोलू शकत नाही का?" अनेक लोकांचा असा विश्वास आहे की नातेसंबंध आदरयुक्त असले पाहिजेत. दोन्ही बाजूंनी ओरड न करता गोष्टी सोडवल्या पाहिजेत.