Marathi Movie Ghoda Trailer Out: दर्जेदार चित्रपटाची सध्या रांगच लागली आहे. 'वेड' आणि 'वाळवी' या चित्रपटननी नवीन वर्षात प्रेक्षकांचे मनोरंजन करण्यात कोणतीही कसर ठेवली नाही. आता आणखी एक मराठी चित्रपट प्रेक्षकांच्या भेटीला येत आहे. 'घोडा' असे या चित्रपटाचे नाव आहे.

'घोडा' चित्रपटाचा ट्रेलर नुकताच प्रदर्शित झाला आहे. गरिबी पाचवीला पुजलेल्या बापाचा संघर्ष या चित्रपटामध्ये आपल्याला पाहायला मिळणार आहे. परिवाराच्या सुखासाठी पळणारा बाप आणि त्याची कहाणी म्हणजे 'घोडा' हा चित्रपट.

मुलाची इच्छा पूर्ण करण्यासाठी, अहोरात्र मेहनत करून धडपडणाऱ्या वडिलांची, वडील-मुलाच्या नात्याची विलक्षण गोष्ट "घोडा" या चित्रपटातून प्रेक्षकांसमोर येणार आहे. अनेक महोत्सवांमध्ये कौतुक झालेला हा चित्रपट १७ फेब्रुवारीला सर्वत्र प्रदर्शित होणार असून, या चित्रपटाचा ट्रेलर नुकताच सोशल मीडियावर प्रदर्शित करण्यात आला आहे.

बांधकाम मजुराचा मुलगा शेजारी राहणाऱ्या मुलासाठी आणलेला घोडा पाहून तसाच घोडा आणण्याची मागणी करतो. पण आर्थिक परिस्थिती बिकट असलेले त्याचे वडील आपल्या मुलाची इच्छा पूर्ण करू शकतात का ? परिवाराच्या सुखासाठी झटणाऱ्या बापाची अनोखी कहाणी घोडा या चित्रपटातून रुपेरी पडद्यावर झळकणार आहे.

मराठी चित्रपटसृष्टीत आतापर्यंत अनेक बाप आणि मुलाच्या नातेसंबंधावर आधारित चित्रपट झाले असले तरी हा चित्रपट नक्कीच वेगळा आहे. कष्टकरी आणि भांडवलदारी वर्ग यांच्या लढ्यात फुलणारं एक गोड स्वप्न म्हणजे "घोडा" हा चित्रपट.

हृदयस्पर्शी कथानक, कसदार लेखन, उत्तम कलाकार असलेला हा चित्रपट तांत्रिकदृष्ट्याही तितकाच दमदार आहे, असा निर्माते दावा करत आहेत. परंतु ट्रेलर पाहिल्यानंतर तुमचे "घोडा" या चित्रपटाविषयीचं कुतूहल नक्कीच वाढेल यात शंका नाही.