Saisha Bhoir Parents Fraud Case: ‘नवा गडी नवा राज्य’ फेम साईशा भोईर नेहमीच आपल्या अभिनयामुळे चर्चेत असते. अगदी लहान वयात प्रसिद्धी झोतात आलेली साईशा नेहमीच सोशल मीडियावर सक्रिय असते. सोशल मीडियावर तिने फार कमी वयातच तिचे लाखो फॉलोवर्स कमावले आहेत. यावेळी सईशा एका वेगळ्याच कारणामुळे चर्चेत आली आहे. साईशाच्या आईने काही दिवसांपूर्वी काही जणांना करोडोंचा गंडा घातल्याचा आरोप आहे. या प्रकरणी लवकरच साईशाचा पोलिस तपास केला जाणार आहे.

कुलाबा इथं राहणाऱ्या एका दाम्पत्याला पूजाने तिच्या कंपनीत गुंतवणूक करण्यास सांगितले होते. या प्रकरणी तिला अटकही करण्यात आली. त्यांनतर पंकज जाधव या २५ वर्षीय व्यक्तीने देखील साईशाच्या आईने पैशांसाठी फसवणुक केल्याचा आरोप केला होता. सदर प्रकरणी, पूजाला अटक करण्यात आली असून तिच्या पोलिस कोठडीत वाढ देखील करण्यात आली आहे. तिची आता ०७ जुलैपर्यंत पोलिस कोठडी वाढवण्यात आली आहे.

पूजा भोईरच्या या प्रकरणात आता नवीन अपडेट समोर आली आहे, पूजा भोईर आणि पती विशांत भोईर यांची मालमत्ता पोलीस जप्त करण्याच्या तयारीत असल्याची माहिती सध्या समोर येत आहे.

एका इंग्रजी संकेतस्थळाने दिलेल्या वृत्तानुसार, पोलीस तपासात पूजा भोईरकडे बक्कळ पैसे आणि दागिने सापडले आहेत. पूजाच्या डिमॅट खात्यावर ३ कोटी ३३ लाख रूपये आहेत, तर मुंबईमध्ये एक अलिशान फ्लॅट, २७ लाख इतक्या रक्कमेचे दागिने अशा वस्तू सापडल्या आहेत.

साईशाच्या आई- वडिलांचे बॅंक अकाऊंट, लक्झरियस कार, साईशाचे बँक अकाऊंट्स यासर्व गोष्टींचा तपास पोलिस सध्या करीत आहे. या मालमत्तेची चौकशी करून पोलिस लवकरच जप्त करणार असल्याचे बोलले जात आहे.

एवढेच नाही तर, पोलिस विशांत, पूजा आणि साईशाने काही आंतरराष्ट्रीय ट्रीप देखील केल्या आहेत, आता त्याची देखील चौकशी करणार आहेत.

पूजाने फक्त मुंबईतच लोकांना गंडा घातला नाही तर, नाशिकमध्ये देखील तिने काही लोकांना गंडा घातला. तब्बल ३ कोटींपेक्षा अधिकचा गंडा घातला असून नाशिक मधील अनेक लोकांनी पूजा आणि पती विशांत भोईरविरोधात लाखोंची फसवणूक केल्याची तक्रार केलीय. सध्या साईशाचे वडिल फरार असून पोलिस त्याचा शोध घेत आहेत.

आता लवकरच साईशाची आणि तिच्या सेटवरदेखील तिचा तपास करण्यात येणार असल्याची माहिती मिळत आहे. साईशा खूपच लहान असल्याने आईला अटक झाल्याने तिच्या मनावर या गोष्टीचा परिणाम होऊ शकतो, यामुळे तिच्याशी या गोष्टीबद्दल बोलणं टाळलं जात आहे.

साईशा सध्या ‘नवा गडी नवा राज्य’ आणि ‘चला हवा येऊ द्या’ मधून ती प्रेक्षकांच्या भेटीला येत आहे.