Tejaswini Pandit Post:

राज्यामध्ये गुन्हेगारीच्या (Maharashtra Crime) घटना दिवसेंदिवस वाढत चालल्या आहेत. दिवसाढवळ्या हत्या, गोळीबार, अत्याचार, तोडफोड अशाप्रकारच्या घटना सतत समोर येत आहेत. राज्यातील कायदा आणि सुव्यवस्थेचा प्रश्न सध्या ऐरणीवर आला आहे. नुकताच पुण्यामध्ये ४ हजार कोटींचा ड्रग्जसाठा सापडला. या घटनांमुळे विरोधकांनी सत्ताधाऱ्यांना चांगलेच धारेवर धरले आहे. अशामध्ये एका प्रसिद्ध मराठमोळ्या अभिनेत्रीने देखील सोशल मीडियावर पोस्ट करत राज्यातील परिस्थितीवर खंत व्यक्त केली आहे.

मराठमोळी अभिनेत्री तेजस्वीनी पंडित ही सोशल मीडियावर खूप सक्रिय असते. नेहमी ती प्रत्येक विषयांवर स्पष्टपणे आणि परखड मत व्यक्त करत असते. मग तो विषय सामाजिक असो वा राजकीय. तेजस्वीनी पंडितने नुकताच राज्यातील परिस्थितीवर चिंता व्यक्त करत सोशल मीडिया प्लॅटफॉर्म एक्सवर पोस्ट केली आहे. तिची ही पोस्ट चांगलीच चर्चेत आली आहे. महत्वाचे म्हणजे तेजस्विनीच्या या पोस्टला पसंती देत चाहत्यांनी तिला पाठिंबा दिला आहे.

तेजस्विनी पंडितने या पोस्टमध्ये असे लिहिले की, 'दुष्काळ, बेरोजगारी, महागाई हे प्रश्न वर्षानुवर्ष सतावत आहेतच… आता सर्रास गोळीबार , खून, ड्रग्ज…? असा आपला महाराष्ट्र कधीच नव्हता.' अशी पोस्ट करत तेजस्विनीने यामध्ये तुटलेला हार्ट इमोजी देखील पोस्ट केला आहे. तेजस्विनीच्या या पोस्टला पसंती देत तिच्या चाहत्यांनी कमेंट्स करत तिचे कौतुक केले आहे. तेजस्विनी पंडितच्या या पोस्टला ५९ हजारांपेक्षा जास्त व्ह्यूज मिळाले आहेत. तर अडीच हजारांपेक्षा अधिक जणांनी लाइक केले आहे.

तेजस्विनीच्या पोस्टवर सोलापूर सूनबाई या ट्विटर अकाऊंटवरून कमेंट्स करण्यात आली असून त्यांनी असे लिहिले की, 'खूप खूप आभाळभरून कौतूक तुझ तेजस्विनी... जिथे मोठी मोठी लोक मूग गिळून गप्प बसली आहेत, तू न घाबरता निर्भिडपणे आपलं मत मांडत आहेस, महाराष्ट्रासाठी उभी आहेस.'

आणखी एका नेटकऱ्याने कमेंट करत लिहिले की, 'तेजस्विनी जी आता कदाचित तुमच्यावर काहीतरी आरोप केले जातील...ट्रोल केलं जाईल !! पण महाराष्ट्र धर्म वाचवण्यासाठी आम्ही तुमच्या सोबत असू. अशेच व्यक्त होत रहा.' तर आणखी एका युजरने लिहिले की, 'खर आहे, महाराष्ट्राचं वैचारिक दिवाळं निघत चाललंय आणि सर्व प्रसिद्ध लोकं मुक्याची भूमिका घेत आहेत. अभिनंदन स्वतःच मत निर्भिडपणे व्यक्त केल्याबद्दल. अजून खूप लोकांना हे करण्याची गरज आहे.'