CLUB 52 Teaser Out:

'तुझ्यात जीव रंगला' (Tuzyat Jeev Rangala) या मालिकेतून राणादाच्या भूमिकेत घराघरामध्ये पोहचलेला अभिनेता हार्दिक जोशी (Hardik Joshi) सध्या त्याचा आगामी चित्रपट 'क्लब 52'मुळे (CLUB 52 Movie) चर्चेत आला आहे. या चित्रपटाच्या माध्यमातून हार्दिक जोशी मराठी सिनेसृष्टीत मुख्य अभिनेत्याच्या रुपाने पदार्पण करणार आहे. हार्दिकच्या 'क्लब ५२' या चित्रपटाचे काही दिवसांपूर्वी पोस्टर त्यानंतर हार्दिक जोशीचा फर्स्ट लूक समोर आला होता. आता या चित्रपटाचा धमाकेदार टीजर (CLUB 52 Teaser) प्रदर्शित झाला आहे.  ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

हार्दिक जोशीने आपल्या अधिकृत इन्स्टाग्राम अकाऊंटवर 'क्लब 52' या चित्रपटाचा टीजर शेअर केला आहे. हा टीझर शेअर करत हार्दिकने कॅप्शनमध्ये 'फक्त पत्त्यांचा नाही, हा खेळ आहे डेरिंगचा... 'क्लब 52' डाव रंगणार १५ डिसेंबरला, तुमच्या जवळच्या चित्रपटगृहात' असे लिहिले आहे. या टीजरमध्ये हार्दिकचा खतरनाक लूक पाहायला मिळत आहे.

दमदार स्टारकास्ट असलेल्या 'क्लब 52' या चित्रपटाचा टीजर नुकताच रिलीज करण्यात आला आहे. नाथ प्रॉडक्शन्स प्रस्तुत या चित्रपटाची निर्मिती आणि प्रस्तुती वैशाली ठाकूर यांनी केली आहे. अमित कोळी दिग्दर्शित हा चित्रपट अॅक्शनपॅक्ड असून या चित्रपटामध्ये हार्दिक जोशी धमाकेदार भूमिकेत दिसणार आहे. बजरंग बादशाह यांच्या कथेवर राकेश शिर्के यांनी पटकथा आणि संवादलेखन केले आहे. येत्या १५ डिसेंबरला हा चित्रपट संपूर्ण महाराष्ट्रात प्रदर्शित होणार आहे.

'एक डाव नियतीचा' अशी टॅगलाईन 'क्लब 52' या चित्रपटाला देण्यात आली आहे. या चित्रपटाचा टीजर पाहून पत्त्यांचा डाव आणि त्याच्याशी संबंधित कथानक असल्याचा अंदाज लावता येतोय. चित्रपटात हार्दिक जोशीसोबत भाऊ कदम, शशांक शेंडे, भरत ठाकूर, यशश्री व्यंकटेश , टीना सोनी, राधा सागर, नितीन रुपनवार, उमेश बोलके हे मुख्य भूमिकेत आहेत. या चित्रपटाच्या अ‍ॅक्शनपॅक्ड टीजरमुळे कथानकाविषयीची उत्सुकता अधिकच वाढली आहे.