मनोरंजन सृष्टीवर शोककळा पसरली आहे. लोकप्रिय अभिनेत्री मन्नारा चोप्रा (Mannara Chopra Father Death) हिच्या वडिलांचे निधन झाले आहे. ज्यामुळे चोप्रा कुटुंबावर दु:खाचा डोंगर कोसळला आहे. मन्नारा चोप्रा हिचे वडील ॲड. रमण राय हांडा (Raman Rai Handa Passed Away) यांनी वयाच्या 72 व्या वर्षी अखेरचा श्वास घेतला आहे. ॲड. रमण राय हांडा हे सुपरस्टार अभिनेत्री प्रियांका चोप्राचे काका होते.

मन्नारा चोप्राच्या वडिलांचे निधन 16 जून 2025 रोजी सोमवारी झाले. यासंबंधित पोस्ट मन्नारा चोप्राने सोशल मीडियावर शेअर केली आहे. मन्नाराने शेअर केलेल्या पोस्टमध्ये अंत्यसंस्काराचे तपशील पाहायला मिळत आहे. मुंबईतील अंधेरी पश्चिम येथे असलेल्या स्मशानभूमीमध्ये त्यांच्या पार्थिवावर अंत्यसंस्कार होणार आहे. 18 जून रोजी दुपारी 1 वाजता मन्नारा चोप्राच्या वडिलांवर अंत्यसंस्कार करण्यात येणार आहेत.

मन्नारा चोप्राच्या वडिलांचे जन्म 25 सप्टेंबर 1953 रोजी झाला. आता मन्नारा चोप्राच्या कुटुंबात मन्नारा, तिची बहीण मिताली आणि आई कामिनी हांडा आहे. मीडिया रिपोर्टनुसार, रमण राय हांडा गेल्या अनेक दिवसांपासून आजारी होते.

रमण राय हांडा हे दिल्ली उच्च न्यायालयात वकील होते. रमण राय हांडा आणि प्रियांका चोप्रा (Priyanka Chopra) यांचे खास नाते आहे. रमण राय हांडा यांचे लग्न कामिनी चोप्रा यांच्यासोबत झाले. कामिनी चोप्रा या प्रियांका चोप्रा आणि परिणीती चोप्राची (Parineeti Chopra)आत्या आहे. याच नात्याने रमण राय हांडा हे प्रियांका चोप्राचे काका होते.