मनोरंजन सृष्टीत सध्या लग्नसराई पाहायला मिळत आहे. एका मागोमाग एक कलाकार विवाह बंधनात अडकले आहेत. अशात आता 'महाराष्ट्राची हास्यजत्रा' या कॉमेडी शोमधून प्रेक्षकांच्या घराघरात पोहचलेली अभिनेत्री ईशा डे नुकतीच लग्नबंधनात अडकली आहे. तिचा विवाह सोहळा थाटामाटात पार पडला आहे. ईशाने लेखक-गीतकार अभिषेक खणकरसोबत लग्नगाठ बांधली आहे. ईशाच्या लग्न सोहळ्याचे खास फोटो आणि व्हिडीओ व्हायरल होत आहेत.

ईशा आणि अभिषेकच्या लग्न सोहळ्याला त्यांचे मित्र, कुटुंब आणि हास्य जत्रेचे कलाकार पाहायला मिळाले. अभिनेत्री वनिता खरातने लग्न सोहळ्याचे खास फोटो शेअर केले आहे. तसेच नवीन जोडप्याला खूप आशिर्वाद दिले आहेत. ईशा आणि अभिषेकने लग्न सोहळ्यासाठी पारंपरिक लूक केला होता. ईशाने सुंदर काठापदराची लाल रंगाची साडी नेसली होती. त्यावर सोनेरी काठ असलेली शाल, गळ्यात हार, नाकात नथ, हातात हिरवा चुडा अशा मराठमोळ्या साज श्रृंगारात ईशा खूपच सुंदर दिसत होती.

अभिषेक खणकर कोण?

ईशा डेचा नवरा अभिषेक खणकर हा प्रसिद्ध गीतकार आहे. 'खुलता कळी खुलेना', 'लक्ष्मी निवास' या लोकप्रिय मालिकांसाठी गीतकार म्हणून त्याने काम केले आहे. तसेच त्याला अनेक पुरस्कारांनी सन्मानित देखील करण्यात आले आहे. त्याने मराठी अभिनेत्री हृता दुर्गुळेच्या 'अनन्या' चित्रपटातील 'तू धगधगती आग' हे गीत लिहिलं आहे.

ईशा डे वर्कफ्रंट

ईशा डे 'महाराष्ट्राची हास्यजत्रा'मधून प्रेक्षकांच्या घराघरात पोहचली. तसेच ईशाने 'गुलकंद' चित्रपटात काम केले आहे. ईशाला देखील पुरस्कारांनी गौरवण्यात आले आहे. सध्या ईशा डे आणि अभिषेक खणकर चाहते, कलाकार, मित्रमंडळी आणि कुटुंब यांच्याकडून प्रेमाची, शुभेच्छांचा आणि कौतुकाचा वर्षाव होत आहे.