आपल्या क्रिकेटने जगाला वेड लावणारा चेन्नई सुपर किंग्जचा कर्णधार क्रिकेटपटू एमएस धोनी (MS Dhoni) आता एका नव्या अंदाजात प्रेक्षकांना भेटायला येणार आहे. तो कायम पडद्यावर छोट्या छोट्या भूमिकांमध्ये दिसत असतो. त्याला पाहण्यासाठी चाहते नेहमीच आतुर असतात. आता धोनी एका नवीन प्रोजेक्टमधून चाहत्यांच्या भेटीला येणार आहे. निर्माता करण जोहरने नुकतीच एक खास पोस्ट केली आहे. ज्याने सर्वांचे लक्ष वेधून घेतले आहे.

करण जोहरच्या (Karan Johar ) आगामी प्रोजेक्टमध्ये एमएस धोनी 'लव्हर बॉय'ची भूमिका साकारणार आहे. याची हटके झलक करणने इन्स्टाग्रामवर एक व्हिडीओ शेअर करून चाहत्यांना दिली आहे. यातून धोनीचा एक नवीन लूक आणि अवतार समोर येणार आहे. करणने शेअर केलेल्या व्हिडीओत क्रिकेटपटू एमएस धोनी रोमँटिक अंदाजात दिसत आहे. व्हिडीओच्या सुरूवातीलाच 'पहिल्यांदाच एमएस धोनी रोमँटिक अवतारात' असे लिहिलेले पाहायला मिळत आहे.

व्हिडीओमध्ये धोनीच्या हातात हार्टच्या आकाराचा फुगा पाहायला मिळत आहे. तो म्हणतो की, "तू सोबत असतेस तेव्हा प्रत्येक प्रवास सुंदर बनतो. " या व्हिडीओवर चाहत्यांकडून कमेंट्सचा वर्षाव होत आहे. चाहते धोनीला नव्या भूमिकेत पाहण्यासाठी आतुर आहेत. एमएस धोनी करण जोहरच्या नवीन जाहिरातील दिसणार आहे. याची एक झलक करणन चाहत्यांसोबत शेअर केली आहे. याआधी देखील धोनीने अनेक जाहिरातीमध्ये काम केले आहे. मात्र ही जाहिरात खास असणार आहे. कारण यात धोनीचा रोमँटिक अंदाज पाहायला मिळणार आहे.