कॅनडामधील सरे येथील कॉमेडियन आणि अभिनेता कपिल शर्माच्या 'कॅप्स कॅफे'वर पुन्हा एकदा गोळीबार झालाय. या गोळीबाराचा एक व्हिडिओ सोशल मीडियावर व्हायरल होतोय. गोळीबारीची जबाबदारी गोल्डी ढिल्लो आणि लॉरेन्स बिश्नोई गँगनं घेतलीय. तसेच या गोळीबारीचा व्हिडिओही त्यांनी सोशल मीडियावर व्हायरल केलाय. सोशल मीडियावर पोस्ट करताना त्यांनी कपिल शर्माला धमकीही दिलीय. रिंग नाही ऐकली तर पुढचा हल्ला हा मुंबईत होईल, अशी धमकी त्यांनी दिलीय. (Goldy Dhillon-Lawrence Bishnoi Gang Claims Responsibility for Kapil Sharma Café Attack)

गोळीबारानंतर गोल्डी ढिल्लो नावाच्या सोशल मीडिया अकाउंटवरून एक पोस्ट व्हायरल होत आहे. "जय श्री राम. सतश्री अकाल. सर्व बांधवांना राम राम. आज कपिल शर्माच्या कॅप्स कॅफेमध्ये गोळीबार झाला. याची जबाबदारी गोल्डी ढिल्लो आणि लॉरेन्स बिश्नोई टोळी घेत आहे अशी पोस्ट सोशल मीडियावर व्हायरल करण्यात आलीय.

पुढे, पोस्टमध्ये लिहिले आहे की, “आम्ही त्याला फोन केला पण त्याला रिंग ऐकू आली नाही, म्हणून आम्हाला कारवाई करावी लागली. जर त्याने तरीही रिंग ऐकली नाही तर आम्ही लवकरच मुंबईत पुढचा हल्ला करू.” मुंबई पोलिस कपिल शर्माला धमकी देणाऱ्या या सोशल मीडिया पोस्टची पडताळणी करत आहेत.