सिनेविश्वातून धक्कादायक बातमी समोर आली आहे. 'बिग बॉस कन्नड' फेम अभिनेत्री दिव्या सुरेश हिने बंगळुरूमध्ये तिच्यासोबत घाणेरडे कृत्य झाल्याचा खुलासा केला आहे. तिने या संबंधित सोशल मीडियावर पोस्ट शेअर केली आहे. तिने पोस्टमध्ये म्हटल्याप्रमाणे, रात्री उशिरा बेंगळुरूमध्ये एका अनोळखी व्यक्तीने तिचा पाठलाग केला आणि अश्लील हावभाव केले.पोस्टमध्ये अभिनेत्रीने घडलेला सर्व प्रकार सांगितला असून, महिलांच्या सुरक्षिततेवर प्रश्नचिन्ह उपस्थित केला आहे.

TOI च्या वृत्तानुसार, अभिनेत्री दिव्या सुरेशने पोस्टमध्ये म्हटले की, "आज रात्री ११.३० च्या सुमारास मी आणि माझी चुलत बहीण कारकडे जात असताना एका माणसाने आमचा पाठलाग सुरू केला. पाठलाग करत असताना तो उघडपणे स्वतःच्या गुप्तांगाला (प्रायव्हेट पार्ट) स्पर्श करत होता. आमच्या हे लक्षात येताच आम्ही त्याला जाब विचारला, पण तो थांबला नाही. आम्ही कारमध्ये बसेपर्यंत तो तसे करत राहिला..."

अभिनेत्रीने पुढे म्हटले की, "केवळ रात्रीच्या वेळी चालत असल्यामुळे कोणत्याही महिलेला छेडछाडीचा सामना करावा लागू नये..." आपल्या पोस्टमध्ये बेंगळुरू पोलिसांना टॅग करून तिने सार्वजनिक सुरक्षिततेच्या आश्वासनांवर प्रश्नचिन्ह उपस्थित केले आणि विचारले, "आम्हाला दिली जाणारी सुरक्षिततेची आश्वासने नक्की कुठे आहेत?" दिव्याने या घटनेचा एक व्हिडिओही तिच्या इन्स्टाग्राम स्टोरीवर शेअर केला होता. अभिनेत्रीच्या या खुलाशाने बेंगळुरूमध्ये महिलांच्या सुरक्षिततेबाबत, विशेषतः रात्रीच्या वेळी सार्वजनिक ठिकाणी होणाऱ्या छेडछाडीच्या घटनांबाबत पुन्हा एकदा चर्चा सुरू झाली आहे.

दिव्या सुरेश कोण?

अभिनेत्री दिव्या सुरेश 'बिग बॉस कन्नड'च्या आठव्या पर्वात सहभागी होती. 'नान्ना हेंदथी एमबीबीएस' (Nanna Hendthi MBBS) आणि 'जोडी हक्की' (Jodi Hakki) या तिच्या गाजलेल्या कन्नड टीव्ही मालिका आहेत. दिव्या सुरेशने २०१७ मध्ये 'मिस इंडिया साउथ'चा किताब जिंकला होता. अभिनेत्रीने '#९, हिल्टन क्रॉस' (#9, Hilton Cross) या चित्रपटातून पदार्पण केले. तसेच त्यांनी 'रौडी बेबी' (Rowdy Baby), 'केम्पू हलदी हसिरु' (Kempu Haladi Hasiru) आणि 'हिरण्या' (Hiranya) या चित्रपटामध्येही काम केले आहे.