मुंबई : बॉलिवूडचा दबंग अभिनेता सलमान खान (Salman Khan) अनेक दिवसांपासून संकटात होता. जीवे मारण्याच्या धमक्यांचे फोन आणि पत्र त्याला आणि त्याच्या कुटुंबाला अधून-मधून येत होते. यामागे लॉरेंस बिश्नोईचा हात होता. त्याने सलमान खानाला संपविण्याच्या कट रचला होता. यात लॉरेंस अपयशी झाला असून या प्रकरणाबाबत महत्वाची माहिती समोर आली आहे.

पंजाब पोलिस मुख्यालयावर झालेल्या हल्ल्याच्या चौकशी दरम्यान पोलिसांच्या विशेष पथकाला दोन संशयित व्यक्ती सापडल्या आहेत. त्यातील एक मुलगा अल्पवयीन असल्याचे समोर आले आहे. तसेच या अल्पवयीन मुलावरच बॉलीवूड अभिनेता सलमान खानला मारण्याची जबाबदारी सोपविण्यात आली होती, असे स्पष्ट करण्यात आले आहे.

अर्शदीप सिंग असे त्या अल्पवयीन मुलाचे नाव आहे. स्फोटके बाळगण्याप्रकरणी त्याला हरियाना पोलिसांनी अटक केली होती. लॉरेंस बिश्नोई याने पंजाबचा गँगस्टर जग्गू भगवानपुरियाच्या टोळीबरोबरच अर्शदीपला हाताशी घेऊन सलमान खानला मारण्याचा कट रचला होता अशी माहिती पोलिस चौकशीतून स्पष्ट झाली आहे. अर्शदीपसह दीपक आणि दागर दोन गुंडानाही त्यांनी या कटात सामील केले होते. या दोघांपैकी एक फरार असून एक तुरुंगात आहे.