Jacqueline Fernandez Sukesh Chandrasekhar | नवी दिल्ली: बॉलिवूड अभिनेत्री जॅकलीन फर्नांडिसच्या अडचणींमध्ये वाढ झाली आहे. अंमलबजावणी संचालनालयाने (ED) जॅकलीनला २१५ कोटी रुपयांच्या खंडणी प्रकरणात आरोपी केले आहे. मिळालेल्या माहितीनुसार, जॅकलीनच्या विरोधात ईडीकडून आज, बुधवारी आरोपपत्र दाखल करण्यात येणार आहे.

सूत्रांच्या माहितीनुसार, सुकेश चंद्रशेखर (Sukesh Chandrashekhar) हा गुन्हेगारी प्रवृत्तीचा आहे आणि खंडणी वसुली करणारा आहे हे जॅकलीनला (Jacqueline Fernandez) आधीपासूनच माहीत होते, असे ईडीचे म्हणणे आहे.

बॉलिवूडची अभिनेत्री जॅकलीन फर्नांडिसचे खंडणीखोर सुकेश चंद्रशेखर याच्यासोबतचे कनेक्शन समोर आल्यानंतर ती आणखी अडचणीत सापडली आहे. ईडीने जॅकलीनवरील कारवाईचा फास आणखी घट्ट केला आहे.

दुसरीकडे, आता ईडीने (ED) जॅकलीन फर्नांडिसला २१५ कोटी रुपयांच्या खंडणी प्रकरणात आरोपी केले आहे. ईडीकडून आज या अभिनेत्रीविरोधात आरोपपत्र दाखल करण्यात येणार आहे, अशी माहिती सूत्रांकडून मिळते.

मिळालेल्या माहितीनुसार, सुकेश चंद्रशेखरने जॅकलीन फर्नांडिसला १० कोटी रुपयांचे गिफ्ट दिले होते. ईडीने तिची ७ कोटी रुपयांहून अधिकची संपत्ती जप्त केली आहे. सुकेशने जॅकलीनच्या कुटुंबातील सदस्यांनाही महागड्या भेटवस्तू दिल्याचेही सांगितले जात आहे. कुटुंबीयांना दिलेल्या महागड्या भेटवस्तूंमध्ये कार, महागड्या वस्तू, तसेच १.३२ कोटी रुपये आणि १५ लाख रुपयांच्या निधीचाही त्यात समावेश आहे.

जॅकलीन फर्नांडिस आता या प्रकरणात पुरती अडकली आहे. सध्या ती ईडीच्या रडारवर असून, तिच्याभोवतीचा कारवाईचा फास घट्ट आवळला असून, तिला या प्रकरणात आरोपी केले आहे.