Priyadarshini Indalkar Viral Video

लोकप्रिय कॉमेडी शो ‘महाराष्ट्राची हास्यजत्रा’मधील अभिनेत्री प्रियदर्शनी इंदलकर जितकी तिच्या अभिनयाकरिता चर्चेत असते, तेवढीच ती आपल्या फॅशनमुळे ही चर्चेत असते. कॉमेडी शो, चित्रपट आणि वेब सीरिजच्या माध्यमातून अभिनेत्रीने आपल्या लाडक्या चाहत्यांचे निखळ मनोरंजन केले. अशातच अभिनेत्रीतील आणखी एक गुण चाहत्यांना दिसला आहे. अभिनेत्रीने शूटिंग दरम्यान एक गाणं गायलंय, या गाण्याचा व्हिडीओ तिने सोशल मीडियावर चाहत्यांसोबत शेअर केला आहे.

प्रियदर्शनी याआधीही ‘फर्जी’ वेब सीरीजच्या माध्यमातून प्रेक्षकांच्या भेटीला आली होती. आता या वेबसीरीजनंतर प्रियदर्शनी ललित प्रभाकर, अभय महाजन, अलोक राजवडे मृण्‍मयी गोडबोले, प्रिया बॅनर्जी यांच्यासोबत ‘शांतीत क्रांती २’ या वेबसीरीजमध्ये मुख्य भूमिकेत झळकणार आहे. या वेबसीरिजच्या शूटिंगच्या वेळी तिने एक गाणं गायलं होतं, त्याचा व्हिडीओ तिने चाहत्यांसोबत शेअर केला आहे.

दरम्यान,गाण्याचा व्हिडीओ सोशल मीडियावर शेअर करताना अभिनेत्रीने ‘शांतीत क्रांतीच्या शूट दरम्यान एकांतात…’ असं कॅप्शन देत अभिनेत्रीने व्हिडीओ शेअर केला आहे. अभिनेत्रीने या व्हिडीओमध्ये ‘तनु वेड्स मनु’ मधील ‘युही’ हे गाणं गायलं आहे. अभिनयाप्रमाणेच गाण्यातही माहीर आहे, असं म्हणत अनेकांनी अभिनेत्रीच्या गाण्याचे कौतुक केलं आहे.

अभिनेत्रीच्या व्हिडीओवर फक्त चाहत्यांनीच नाही तर, बऱ्याच सेलिब्रिटींनीही कौतुकाचा वर्षाव केला आहे. अभिनेत्रीच्या या पोस्टवर एक कमेंट प्रचंड चर्चेत आली आहे, ती कमेंट म्हणजे, ‘शांतीत क्रांतीच्या शूटवेळी, शांतीत केलेली क्रांती...’ अशी कमेंट तिला एका चाहत्याने केली आहे. तर आणखी एक युजर म्हणतो, ‘आलिया परिणीतीपेक्षाही तू छान गाणं गायली आहेस’, तर आणखी एक जण म्हणतो, ‘किती सुंदर प्रियदर्शनी, ऑल राऊंडर आहेस तू’ तर आणखी एक जण म्हणतो, ‘जबरदस्त आवाज आहे गं तुझा...’, अशा विविध प्रतिक्रिया प्रियदर्शनीच्या व्हिडीओवर तिच्या चाहत्यांनी दिल्या आहेत.