Tamil Comedian Mayilsamy Dies of Heart Attack: दाक्षिणात्य सिनेसृष्टीसाठी आणखी एक दुःखद बातमी आहे. तामिळमधील प्रसिद्ध विनोदवीर मायिलसामी यांचे निधन झाले आहे. टॉलिवूडमधील अभिनेते आणि नेते नंदामुरी तारक रत्न यांच्या निधनानंतर आणखी एका अभिनेत्याच्या निधनाने दाक्षिणात्य चित्रपट सृष्टीवर शोककळा पसरली आहे.

सालिग्रामम (चेन्नई) येथे अभिनेत्याची अचानक प्रकृती बिघडली. त्यानंतर त्यांना चेन्नईतील एका खासगी रुग्णालयात नेण्यात आले होते. रुग्णालयात नेताच डॉक्टरांनी त्यांचा आधीच मृत्यु झाल्याचे सांगितले.

मायिलसामी यांच्या निधनानंतर अनेक दाक्षिणात्य कलाकारांनी त्यांना श्रद्धांजली अर्पण केली आहे तसेच दुःख व्यक्त केले आहे. मायिलसामी सालिग्रामम येथे राहत होते. प्रकृती बिघडल्यानंतर त्यांना कुटुंबीयांनी चेन्नईतील बोरूर येथील जवळच्या रुग्णालयात नेले. पण त्याआधीच त्यांना मृत्युने कवटाळले होते.

मायिलसामी त्यांनी विवेक आणि वडिवेलूसह विनोदी कलाकारांसोबत 200 हून अधिक चित्रपटांमध्ये काम केले आहे. कांचना (2011), वेदालम (2015), गिली (2004), वीरम (2014), कांचना-2 (2015), कासू मेला कासू (2018) यासह विविध चित्रपटांमध्ये मायलासामीने मुख्य भूमिका साकारल्या आहेत.

मायलासामी यांनी 2021 साली विरुगंबक्कम मतदारसंघातून अपक्ष उमेदवार म्हणून विधानसभा निवडणूकही लढवली होती. मायिलसामीन हे केवळ विनोदी कलाकारच नव्हते, तर त्यांनी अनेक अप्रतिम भूमिकाही साकारल्या होत्या. मायलसामी यांनी चित्रपटांव्यतिरिक्त टीव्ही शो देखील केले.