Singer Death: संगीतविश्वातून एक अत्यंत दुःखद बातमी समोर आली आहे. १९६० आणि ७० च्या दशकात आपल्या दमदार आवाजाने जगभरातील संगीतप्रेमींना भुरळ घालणारे प्रसिद्ध गायक डेव्हिड क्लेटन-थॉमस यांचे वयाच्या ८४ व्या वर्षी अल्पशा आजाराने निधन झाले. त्यांच्या निधनामुळे जागतिक संगीत क्षेत्रावर शोककळा पसरली असून चाहते सोशल मीडियावर त्यांना श्रद्धांजली अर्पण करत आहेत.

डेव्हिड क्लेटन-थॉमस यांच्या पीआरने त्यांच्या निधनाची अधिकृत माहिती दिली. बुधवारी संध्याकाळी टोरंटो येथील एका रुग्णालयात त्यांनी अखेरचा श्वास घेतला. त्यांच्या निधनाची बातमी समोर येताच संगीतविश्वातील अनेक दिग्गज कलाकारांनी दुःख व्यक्त केले आहे.

डेव्हिड क्लेटन-थॉमस यांना खरी लोकप्रियता अमेरिकेतील प्रसिद्ध रॉक बँड ब्लड, स्वेट अँड टीअर्सचे मुख्य गायक म्हणून मिळाली. या बँडने १९७० मध्ये दोन प्रतिष्ठित ग्रॅमी पुरस्कार पटकावले. त्यांच्या गायकीमुळे या बँडला आंतरराष्ट्रीय स्तरावर मोठी ओळख मिळाली. गायनासोबतच ते एक उत्कृष्ट गीतकारही होते. त्यांनी लिहिलेले 'स्पिनिंग व्हील' हे गाणे १९६९ मध्ये बिलबोर्ड हॉट १०० चार्टमध्ये दुसऱ्या क्रमांकावर पोहोचले होते. तसेच 'व्हेन आय डाय' आणि 'यू हॅव्ह मेड मी सो व्हेरी हॅपी' ही त्यांची गाणीही प्रचंड गाजली

१३ सप्टेंबर १९४१ रोजी इंग्लंडमध्ये जन्मलेल्या डेव्हिड यांचे वडील कॅनेडियन सैनिक होते. १९६६ मध्ये त्यांनी 'ब्रेनवॉश' हे युद्धविरोधी गाणे लिहून रेकॉर्ड केले. हे गाणे कॅनडामध्ये मोठ्या प्रमाणावर लोकप्रिय ठरले आणि त्यांच्या कारकिर्दीतील महत्त्वाचा टप्पा मानले जाते. बँडपासून वेगळे झाल्यानंतरही डेव्हिड यांनी यशस्वी कारकीर्द घडवली. त्यांनी १२ हून अधिक अल्बम प्रदर्शित केले आणि संगीत क्षेत्रातील योगदानासाठी त्यांचा कॅनेडियन म्युझिक हॉल ऑफ फेममध्ये समावेश करण्यात आला. त्यांच्या निधनाने संगीतविश्वाने एक अष्टपैलू गायक, गीतकार आणि प्रेरणादायी कलाकार गमावला आहे.