बॉलिवूडमधून धक्कादायक बातमी समोर येत आहे. प्रसिद्ध अभिनेत्याला जीवे मारण्याची धमकी दिली गेली. दिव्या दत्ताची वेब सीरिज 'चिरैया' सध्या चांगलीच चर्चेत आहे. ही सीरिज २० मार्च २०२६ रोजी जिओ हॉटस्टारवर प्रदर्शित झाली. 'चिरैया' शशांक शाह दिग्दर्शित आहे. या सीरिजमध्ये मुख्य भूमिकेत प्रसन्न बिष्ट, सिद्धार्थ शॉ झळकले आहेत. 'चिरैया'चा मुख्य अभिनेता सिद्धार्थ शॉला धमक्या मिळाल्या.

'चिरैया'ची कथा

'चिरैया' सीरिजमध्ये वैवाहिक बलात्कार, लग्नानंतर पतीकडून होणारी जबरदस्ती, पुरुष प्रधानता आणि महिलांची संमती यांसारख्या गंभीर विषयांना हात घालण्यात आला आहे. नवरा त्याच्या बायकोसोबत तिच्या परवानगीशिवाय वारंवार लैंगिक संबंध ठेवताना या सीरिजमध्ये दिसते. सिद्धार्थचे पात्र नकारात्मक भूमिकेत चित्रित केले आहे, ज्यामुळे त्याला ऑनलाइन मोठ्या प्रमाणात द्वेषपूर्ण टीकेला सामोरे जावे लागत आहे.याबद्दल अभिनेत्याने नुकतेच भाष्य केले आहे.

हिंदुस्तान टाइम्सच्या वृत्तानुसार, मुलाखतीत सिद्धार्थ म्हणाला, "तुला एका निळ्या ड्रममध्ये टाकायला पाहिजे, असा मेसेज लोक मला पाठवत आहेत..." (मेरठ भीषण हत्याकांडात एका महिलेने प्रियकरासोबत मिळून आपल्या पतीची हत्या केली होती. त्यानंतर नवऱ्याच्या मृतदेहाचे तुकडे करून निळ्या ड्रममध्ये टाकले होते. )

सिद्धार्थला मात्र या द्वेषाचा, रागाचा आनंद होत आहे. तो पुढे म्हणाला की, "एक पुरुष म्हणून मला जो आता द्वेष मिळत आहे, त्यात सर्व शिव्या आहेत. पण एवढा द्वेष पाहून मला खूप आनंद होतो, कारण त्यामागे केवळ माझ्याबद्दलचे प्रेम आहे. जर कोणाला इतक्या द्वेषाचा सामना करावा लागत असेल, तर याचा अर्थ मी माझे काम व्यवस्थित केले आहे." पुढे मुलाखतीत अभिनेत्याने स्पष्ट केले की, अनेक दृश्यांचे चित्रीकरण करताना त्याला पॅनिक अटॅक आला होता. तसेच मधुचंद्राच्या रात्रीचा सीन करताना सिद्धार्थची अवस्था खूप वाईट होती. तो खूप थरथर कापत होता आणि रडला होता.