Dhurandhar 2: बॉलिवूडमध्ये सध्या आदित्य धर आणि रणवीर सिंगच्या ‘धुरंधर २’ने बॉक्स ऑफिसवर जबरदस्त धुमाकूळ घातला आहे. हा चित्रपट रिलीज होण्याच्या आधीपासून चर्चेत आहे. विशेष म्हणजे, रिलीजच्या पहिल्याच दिवशी या चित्रपटाने ऐतिहासिक कमाई करत नवा रेकॉर्ड केला आहे. विशेष म्हणजे, हा चित्रपट पहिल्याच दिवशी 100 कोटी रुपयांचा टप्पा पार करणारा पहिला हिंदी चित्रपट ठरला आहे.

चित्रपटाच्या रिलीजपूर्वीच प्रेक्षकांमध्ये प्रचंड उत्सुकता होती. त्याचा परिणाम अॅडव्हान्स बुकिंग आणि पेड प्रिव्ह्यूमध्ये स्पष्ट दिसून आला. रिलीजच्या आधीच झालेल्या पेड प्रिव्ह्यूमधून चित्रपटाने तब्बल 40 कोटींपेक्षा जास्त कमाई केली, जी बॉलिवूडसाठी एक मोठी पेड प्रिव्ह्यू कमाई आहे.

पहिल्या दिवशी सकाळपासूनच चित्रपटाला जोरदार प्रतिसाद मिळाला. सुरुवातीच्या आकडेवारीनुसार, संध्याकाळपर्यंत चित्रपटाने सुमारे 70 ते 80 कोटींची कमाई केली होती आणि अखेर दिवसाअखेर हा आकडा 100 कोटींच्या पुढे गेला. त्यामुळे ‘धुरंधर २’ने ‘जवान’सारख्या मोठ्या चित्रपटांचाही रेकॉर्ड मोडल्याची चर्चा रंगली आहे.

दिग्दर्शक आदित्य धर यांच्या या स्पाय-ॲक्शन चित्रपटाला मल्टिप्लेक्स आणि ओव्हरसीज मार्केटमध्ये विशेष प्रतिसाद मिळताना दिसत आहे. मोठ्या प्रमाणात स्क्रीन रिलीज, दमदार स्टारकास्ट आणि फ्रँचायझीमुळे चित्रपटाला ओपनिंगपासूनच फायदा झाला आहे. पहिल्याच दिवशी 100 कोटींचा टप्पा पार केल्यामुळे ‘धुरंधर २’ आता 500 कोटीं टप्पा पार करेल, असा अंदाज व्यक्त केला जात आहे.