सध्या सर्वत्र कान्स चित्रपट महोत्सवाची चर्चा पाहायला मिळत आहे. बॉलिवूड, हॉलिवूडसोबतच मराठी कलाकारांची मांदियाळी देखील कान्स फिल्म फेस्टिवलमध्ये पाहायला मिळाली. ७९ वा 'कान्स फिल्म फेस्टिवलला मराठीतील महाराष्ट्राची आवडती जोडी ज्येष्ठ अभिनेते अशोक सराफ आणि अभिनेत्री निवेदिता सराफ यांनी एन्ट्री घेतली. कान्सच्या रेड कार्पेटवर हा ऐतिहासिक क्षण रंगला. या गोड क्षणाचे फोटो आणि व्हिडीओ सोशल मीडियावर व्हायरल होत आहेत.

'कान्स फिल्म फेस्टिवल' साठी अशोक मामा आणि निवेदिता सराफ यांनी खास मराठमोळा लूक केला होता. मराठी संस्कृती जपत त्यांनी कान्सच्या रेड कार्पेटवर पाऊल ठेवले. अशोक मामा रेड कार्पेटवर येताच त्यांनी हात जोडून सगळ्यांना नमस्कार केला. त्यांच्या या कृतीचे सर्वत्र कौतुक होत आहे. मामांनी पांढऱ्या रंगाचा सूट आणि काळ्या रंगाची पँट घालून साधा-सिंपल पारंपरिक लूक केला होता. तर निवेदिता सराफ यांनी सुंदर पैठणी नेसली होती. पारंपरिक दागिने, केसांत गजरा माळून त्यांनी मराठमोळा साज श्रृंगार केला होता.

अशोक मामा आणि निवेदिता सराफ यांनी एकमेकांचा हात धरून रेड कार्पेटवर एन्ट्री घेतली. त्यांचा हा क्यूट रोमँटिक अंदाज प्रेक्षकांना खूप आवडला. अशोक मामा आणि निवेदिता सराफ हे मराठी, हिंदी मनोरंजन विश्वातील पावर कपल आहे. त्यांनी आजवर अनेक मालिका आणि चित्रपटात काम केले आहे. त्यांच्या या व्हिडीओवर नेटकरी, चाहते, कलाकार भरभरून कमेंट्स करत आहेत. तसेच ही महाराष्ट्रासाठी खूप मोठी अभिमानाची गोष्ट आहे. अशोक मामांवर प्रेमाचा वर्षाव होत आहे.

'कान्स फिल्म फेस्टिवल २०२६' मध्ये कोण कोण मराठी कलाकार दिसले

• ज्येष्ठ अभिनेते अशोक सराफ

• ज्येष्ठ अभिनेत्री निवेदिता सराफ

• पुष्कर जोग

• प्राजक्ता माळी

• अंकिता वालावालकर