Box Office Collection: बॉलिवूडमध्ये एकीकडे टायगर श्रॉफचा अॅक्शनपट ‘बागी 4’ आणि विवेक अग्निहोत्री यांचा राजकीय नाट्यपट ‘द बंगाल फाइल्स’ प्रदर्शित झाला आहे, तर हॉलिवूडमधून आलेल्या ‘द कॉन्ज्यूरिंग: लास्ट राइट्स’ या हॉरर चित्रपटाने थेट भारतीय प्रेक्षकांच्या मनावर राज्य केले. तिन्ही चित्रपटांचे विकेंड बॉक्स ऑफिस कलेक्शन जाहीर झाले असून हॉलीवूडच्या चित्रपटाने बॉलिवूडच्या मोठ्या रिलीजलाही मागे टाकले आहे.

टायगर श्रॉफच्या ‘बागी 4’ने पहिल्या दिवशी तब्बल 12 कोटींची ओपनिंग केली. मात्र दुसऱ्या दिवशी कमाईत घट झाली आणि या चित्रपटाने 9.25 कोटींचं कलेक्शन केलं. रविवारी म्हणजेच तिसऱ्या दिवशी 10 कोटी मिळाले. तीन दिवसांत चित्रपटाने एकूण 31.25 कोटींची कमाई केली.

दुसरीकडे, विवेक अग्निहोत्रींचा ‘द बंगाल फाइल्स’ या चित्रपटाला मिश्र प्रतिसाद मिळाला. पहिल्या दिवशी केवळ 1.75 कोटींचा गल्ला जमवणाऱ्या या चित्रपटाने दुसऱ्या दिवशी 2.25 कोटी आणि तिसऱ्या दिवशी 2.75 कोटींची कमाई केली. विकेंडचे एकूण कलेक्शन 6.65 कोटी इतकेच झाले आहेत. पश्चिम बंगालमधील बंदीमुळे या चित्रपटाच्या कलेक्शनवर परिणाम झाल्याचे बोलले जात आहे.

याउलट हॉलिवूडचा ‘द कॉन्ज्यूरिंग: लास्ट राइट्स’ भारतीय बॉक्स ऑफिसवर जबरदस्त यशस्वी ठरला. पहिल्याच दिवशी चित्रपटाने 18 कोटींची कमाई करून सर्वांना थक्क केले. तीन दिवसांच्या अखेरीस या हॉरर चित्रपटाने तब्बल 50 कोटींचा टप्पा गाठला. त्यामुळे विकेंडमध्येच त्याने ‘बागी 4’ आणि ‘द बंगाल फाइल्स’ या दोन्ही चित्रपटांना मागे टाकले.