मुंबई : बॉलिवूडचा किंग खान(Shahrukh Khan) आणि दबंग खान(Salman Khan) यांना कोणत्याही ओळखीची गरज नाही. या दोन कलाकारांनी एकापेक्षा एक सुपरहिट चित्रपट या इंडस्ट्रीला दिले आहेत. ज्यांची तुलना करणे खरोखरच कठीण आहे. या दोन कलाकारांनी 'करण अर्जुन' सारखा सुपरहिट चित्रपट एकत्र केला होता. परंतु त्यानंतर ही जोडी पुन्हा कोणत्या चित्रपटात एकत्र दिसली नाही. या दोन खानस् ना पुन्हा एकत्र एका स्क्रीनवर बघण्यासाठी त्यांचे चाहते अनेक वर्षांपासून वाट पाहत आहे. मात्र लवकरच त्यांच्या चाहत्यांच्या प्रतिक्षेला पूर्णविराम लागणार आहे. माहितीनुसार, शाहरुख खान आणि सलमान खान लवकरच एका सिनेमामध्ये सोबत काम करणार असल्याचे बोलले जात आहे.

बॉलिवूडचे हे दोन सुपरस्टार शाहरुख खान आणि सलमान खान एकाच सिनेमात काम करणार आहेत. सलमानच्या 'टायगर ३' आणि शाहरुखच्या 'पठान' या आगामी सिनेमांचा निर्माता आदित्य चोप्रा या दोन्ही सुपरस्टार्सला त्याच्या आगामी सिनेमात एकत्र आणत असल्याचे सांगण्यात आले आहे. 'करण अर्जुन'च्या जोडीसोबत चित्रपट करण्याची बातमी खरी आहे. पण आदित्य चोप्राच्या सिनेमाआधी आणखी एका सिनेमात ही जोडी एकत्र दिसणार आहे.

एका ऑनलाईन पोर्टलच्या माहितीनुसार, आमिर खानसोबत 'गजनी' सारखा दमदार सिनेमा बनवणारा दिग्दर्शक ए.आर. मुरुगदास एका कथेवर काम करत आहे. ज्यामध्ये त्याला शाहरुख आणि सलमानला एकत्र कास्ट करायचे आहे. या प्रोजेक्टबाबत दिग्दर्शक आणि दोन्ही सुपरस्टार्सची मिटिंगही झाल्याचा दावा करण्यात येत आहे.

या चित्रपटाच्या मिटिंगसाठी शाहरुख आणि सलमानला एकत्र आणण्यात आमिर खानचा मोठा हात आहे. आमिरने 'गजनी'मध्ये मुरुगदाससोबत काम केले आहे. जेव्हा दिग्दर्शकाला शाहरुख-सलमानला त्याच्या कथेत कास्ट करण्याची कल्पना सुचली तेव्हा त्याने आमिरला सांगितले. आमिरने क्षणाचाही विलंब न करता या तिघांची भेट ठरवण्याचा निर्णय घेतला. आता लवकरच दोन्ही स्टार्सना या सिनेमाची पुढील माहिती दिली जाईल आणि त्यानंतर या सिनेमाचे पुढच्या वर्षापासून काम सुरु होईल.