The Kerala Story: ‘द केरला स्टोरी’ (The Kerala Story) चित्रपटाचा ट्रेलर प्रदर्शित झाल्यापासून बऱ्याच प्रमाणात वादाच्या भोवऱ्यात सापडलाय. हा चित्रपट 5 मे पासून अर्थात आजापासून थिएटरमध्ये प्रदर्शित झाला. ‘द केरला स्टोरी’ चित्रपटाच्या प्रदर्शनाला केरळ उच्च न्यायालयाने स्थगिती देण्यास नकार दिला आहे. सोबतच चित्रपटाच्या ट्रेलरमध्ये कोणत्याही विशिष्ट समुदायाविरोधात आक्षेपार्ह काहीही नसल्याचेही न्यायालयाने आज दिलेल्या निर्णयात स्पष्ट केलं आहे.

सर्वोच्च न्यायालयाने या प्रकरणी निर्णय देण्यापूर्वी चित्रपटाचा ट्रेलर पाहिला होता. या प्रकरणी निर्णय सुनावताना न्यायालयाने स्पष्ट केले की, इस्लाम आणि मुस्लिमांच्या विरोधात आक्षेपार्ह असं काहीही नाही. तसेच इराक आणि सीरियाचे सर्वाधिक दृश्य या चित्रपटात दाखवण्यात आले आहेत. या चित्रपटात मुस्लिम धर्मावर कोणताही आरोप करण्यात आलेला नाही. यात 'इस्लामिक स्टेट ऑफ इराक अँड सीरिया'ची (ISIS) गोष्ट सांगण्यात आली आहे.

याशिवाय न्यायालयाने असेही म्हटले आहे की, अनेक चित्रपटांमध्ये हिंदू संन्यासींना तस्कर आणि बलात्कारी म्हणून दाखवण्यात आले होते. परंतु कोणताही विरोध झाला नाही. असे अनेक हिंदी आणि मल्याळम चित्रपट आहेत.

दरम्यान, द केरळ स्टोरी आजच सिनेमागृहात प्रदर्शित झाला आहे. चित्रपटाच्या निर्मात्याने न्यायालयाला आश्वासन दिले आहे की, 'केरळमधील ३२,००० हून अधिक महिला आयएसआयएसमध्ये सामील झाल्या' असा दावा करणारा वादग्रस्त टीझर सोशल मीडियावरून काढून टाकला जाईल.''