बॉलिवूड चित्रपटांमध्ये आपल्या प्रभावी आणि दमदार भूमिकांसाठी ओळखली जाणारी अभिनेत्री सुरवीन चावलाने नुकताच एका मुलाखतीमध्ये अस्वस्थ करणारी गोष्ट सांगितली. सुरवीन चावला देखील इतर अभिनेत्रींप्रमाणे कास्टिंग काउचची शिकार झाली. तिने आपल्या नुकताच प्रदर्शित झालेल्या 'क्रिमिनल जस्टिस ४' या वेबसीरिजच्या प्रमोशनसाठी दिलेल्या मुलाखतीमध्ये हा अनुभव अतिशय परखडपणे शेअर केला. एका डायरेक्टरने तिला मिटिंगदरम्यान किस केल्याचे तिने सांगितले.

सुरवीनने कास्टिंग काउचचा अनुभवही शेअर करताना सांगितले की, 'मुंबईतील वीरा देसाई रोडवर ही घटना झाली. माझी एका डायरेक्टरसोबत मिटिंग झाली. आमच्यात व्यावसायिक गप्पा झाल्या, मी त्यांना माझ्या नवऱ्याबद्दल सांगितलं कारण त्यावेळी माझे लग्न झालं होते. आमची मिटिंग संपल्यानंतर मी तिथून निघून जात होते तेव्हा तो डायरेक्टर मला गेटवर सोडण्यासाठी आला. मी गुडबाय बोलताच तो खाली वाकला आणि त्याने मला किस करण्याचा प्रयत्न केला. मी त्याला ढकलून दूर केले आणि तिथून निघून गेले.'

सुरवीनने पुढे सांगितले की, 'काही लोकं असं गृहीत धरतात की काम मिळवण्यासाठी हे सर्व सहन करावे लागते. पण हे खूपच चुकीचे आहे. इंडस्ट्रीत होणाऱ्या या शोषणाविरोधात उघडपणे बोलण्याची वेळ आता आली आहे. मुलींनी धाडसाने काम करावे आणि अशा लोकांचा पर्दाफाश करावा. त्यांची नावे कितीही मोठी असली तरीसुद्धा उघडपणे बोलावे.'

सुरवीनने सांगितले की, एकदा साऊथ इंडस्ट्रीतील एका प्रसिद्ध दिग्दर्शकाने मला त्याच्यासोबत झोपायला सांगितले होते. त्या दिग्दर्शकाला हिंदी किंवा इंग्रजी येत नव्हती. म्हणून त्याने हे मला तिसऱ्या व्यक्तीमार्फत कळवले होते. जेव्हा सुरवीनने टेलिव्हिजनवरून चित्रपटांमध्ये काम करण्यास सुरूवात केली तेव्हा तिला तिच्या लूक आणि शरीरयष्टीवरून खूप अपमानास्पद बोलण्यात आले होते. तो अनुभव सांगताना सुरवीन म्हणाली की, मला माझ्या पहिल्या चित्रपटाच्या मिटिंगवेळी माझे वजन, कंबर आणि छातीच्या आकाराबद्दल प्रश्न विचारले गेले होते.