बॉलिवूडची धक-धक गर्ल अभिनेत्री माधुरी दीक्षित (Madhuri Dixit ) नेहमीच तिच्या अभिनय आणि सौंदर्यासाठी ओळखली जाते. तिने आजवर अनेक हिट चित्रपटांमध्ये काम केले आहे. तिच्या अभिनय शैलीमुळे तिने लाखो चाहत्यांच्या मनात घर केले आहे. सध्या माधुरी दीक्षित एका वेगळ्या गोष्टीमुळे चर्चेत आली आहे. तिने आपले कार्यालय भाड्याने दिलं आहे.

अभिनेत्री माधुरी दीक्षितने आपले अंधेरीतील कार्यालय खासगी कंपनीला भाड्याने दिले आहे. हे कार्यालय अंधेरी पश्चिमेला आहे. या कार्यालयचे तिला दरमहिना तीन लाख रुपये भाडे मिळणार आहे. तिचे कार्यालय १५९४.२४ चौरस फुटांचे आहे. मीडिया रिपोर्टनुसार, हा सर्व व्यवहार १३ नोव्हेंबरला झाला आहे. या व्यवहारात संबंधित कंपनीने नऊ लाख रुपयांचे डिपॉझिट दिले आहे.

माधुरी दीक्षित पहिल्या वर्षी तीन लाख रुपये भाडे घेणार असून 12 महिन्यांनंतर ३ लाख १५ हजार रुपये एवढे भाडे घेतले जाणार आहे. मीडिया रिपोर्टनुसार, माधुरी दीक्षितने अंधेरीतील कार्यालय 'करमतारा इंजिनिअरिंग प्रायव्हेट लिमिटेड'ला दोन वर्षांसाठी भाड्याने दिले आहे. या वर्षी नोव्हेंबरला अभिनेता शाहिद कपूर याने देखील वरळी येथील आलिशान फ्लॅट २० लाख रुपयांच्या भाड्याने दिला आहे.

नुकतीच माधुरी दीक्षित कार्तिक आर्यनच्या भूल भुलैया या चित्रपटातून प्रेक्षकांच्या भेटीला आली होती. या चित्रपटातील 'आमी जे तोमार' हे गाणे खूप हिट झाले आहे. चाहते माधुरी दीक्षित यांच्या आगामी प्रोजेक्टसाठी खूप उत्सुक असतात. माधुरी दीक्षितचा सोशल मीडियावर मोठा चाहता वर्ग आहे. त्यांचे इंस्टाग्रामवर 39.8 मिलियन फॉलोवर्स आहेत.