सध्या बॉक्स ऑफिसवर पॅराऑलिम्पिकमध्ये गोल्ड मेडल मिळवणाऱ्या मुरलीकांत पेटकर यांच्या ‘चंदू चॅम्पियन’ या बायोपिकची तुफान चर्चा सुरू आहे. या बायोपिकमध्ये, मुरलीकांत यांचा एक सैनिक आणि बॉक्सर होण्यापासून ते गंभीर दुखापतीतून बरा झाल्यानंतर जलतरणपटू होण्यापर्यंतचा थक्क करणारा प्रवास दाखवण्यात आला आहे. ही सर्व किमया दिग्दर्शक कबीर खान यांनी दाखवली असून चित्रपटामध्ये प्रमुख भूमिकेत कार्तिक आर्यन आहे. सध्या हा चित्रपट बॉक्स ऑफिसवर दिलासादायक कमाई करीत असून चित्रपटाने पहिल्या दिवशी फार उत्तम कमाई केलेली नाही. पण चित्रपटाच्या कमाईमध्ये विकेंडला कमाईत उत्तम वाढ झालेली आहे.

सॅकनिल्क ट्रेड ॲनालिस्टने दिलेल्या माहितीनुसार, कार्तिक आर्यनच्या या बहुचर्चित चित्रपटाने पहिल्या दिवशी फक्त ४.७५ कोटी रुपयांची कमाई केली होती. तर आता दुसऱ्या दिवशी चित्रपटाच्या कमाईत दमदार वाढ झालेली पाहायला मिळत आहे. ‘चंदू चॅम्पियन’ चित्रपटाने दुसऱ्या दिवशी ६.७५ कोटी कमावले. त्यामुळे दोन दिवसांत या चित्रपटाच्या एकूण कमाईचा आकडा ११.५० कोटी इतका झाला आहे. गेल्या अनेक दिवसांपासून या चित्रपटाची सोशल मीडियावर जोरदार चर्चा सुरू आहे. निर्मात्यांनी या चित्रपटाची निर्मिती १२० कोटींमध्ये झालेली आहे.

कार्तिक आर्यनचा ‘चंदू चॅम्पियन’ चित्रपट फक्त देशातच नाही तर जगभरात रिलीज झालेला. जगभरातही हा चित्रपट दमदार कमाई करत आहे. चित्रपटाचे दिग्दर्शन कबीर खान करीत असून चित्रपटाची निर्मिती साजिद नाडियादवाला आणि कबीर खान यांनी केली आहे. चित्रपटात कार्तिक आर्यनसोबत भुवन अरोरा, राजपाल यादव, यशपाल शर्मा, विजय राज, अनिरुद्ध दवे, पलक लालवानी आणि इतर कलाकारांनी महत्त्वपूर्ण भूमिका साकारल्या आहेत.