बिहारच्या प्रसिद्ध गायिका शारदा सिन्हा (Sharda Sinha) यांचे निधन झाले आहे. मंगळवारी रात्री यांनी अखेरचा श्वास घेतला आहे. शारदा यांची गेल्या अनेक दिवसांपासून तब्येत ठीक नव्हती. त्या आजारी होत्या. दिल्लीतील एम्स रुग्णालयात त्या दाखल होत्या. वयाच्या ७२ व्या वर्षी बिहारच्या गायिकेने शेवटचा श्वास घेतला.

गायिका शारदा सिन्हा यांचे निधनं झाल्यामुळे मनोरंजन विश्वात शोककळा पसरली आहे. शारदा सिन्हा यांना सोमवारी सायंकाळी व्हेंटिलेटरवर ठेवण्यात आले होते. गायिका मल्टिपल ऑर्गन डिसफंक्शन या अवस्थेत होत्या. छठपूजेच्या पहिल्याच दिवशीच शारदा सिन्हा यांनी जगाचा निरोप घेतला. गायिका शारदा सिन्हा यांचा मुलगा अंशुमन सिन्हा यांनी सोशल मीडियावर पोस्ट करून ही दुःखद बातमी शेअर केली आहे.

पंतप्रधान नरेंद्र मोदी यांनी शारदा सिन्हा यांच्या तब्येतीची विचारपूस केली होती. तसेच शारदा सिन्हा यांच्या निधनानंतर पंतप्रधान नरेंद्र मोदी यांनी सोशल मीडियावर पोस्ट केली आहे. शोक व्यक्त करत ते म्हणाले की," प्रसिद्ध लोकगायिका शारदा सिन्हा यांच्या निधनाने खूप दुःख झाले. त्यांनी गायलेली मैथिली आणि भोजपुरी लोकगीते गेल्या अनेक दशकांपासून खूप लोकप्रिय आहेत. त्यांच्या निधनाने संगीत जगताची कधीही भरून न येणारी पोकळी निर्माण झाली आहे. या दु:खाच्या प्रसंगी माझे विचार त्यांच्या कुटुंबियांसोबत आणि चाहत्यांसोबत आहेत."

बिहारच्या प्रसिद्ध गायिका शारदा सिन्हा यांचा जन्म १ ऑक्टोबर १९५२ रोजी हुलसा या गावात झाला. बिहारच्या प्रसिद्ध गायिका शारदा सिन्हा यांना २०१८ मध्ये पद्मभूषण पुरस्काराने सन्मानित करण्यात आले होते. त्यांच्या गाण्यांना लोकांनी भरपूर प्रेम दिले. त्यांची छठची गाणी खूप प्रसिद्ध आहेत.