'बिग बॉस मराठी 5' विजेता सूरज चव्हाणचा (Suraj Chavan ) 'झापुक झुपूक' (Zapuk Zupuk ) चित्रपट लवकरच प्रेक्षकांच्या भेटीला येणार आहे. नुकतेच चित्रपटाचे नवे पोस्टर रिलीज झाले आहे. 'झापुक झुपूक' या चित्रपटाच्या ह्या नव्या पोस्टरमध्ये मराठी मालिका विश्वातील लोकप्रिय चेहरे पाहायला मिळत आहेत. केंदार शिंदे दिग्दर्शित 'झापुक झुपूक' चित्रपटात सूरज चव्हाणसह लोकप्रिय इतर कलाकार कल्ला करताना दिसणार आहेत. 'झापुक झुपूक' चित्रपटाचे दिग्दर्शन केदार शिंदे यांनी केले आहे.

पोस्टरला सूरज चव्हाणने हटके कॅप्शन दिलं आहे. त्याने लिहिलं की, "टॉपचा किंग आलाय पिक्चर मधल्या आख्यांना घेऊन...आता २५ एप्रिलपासून आख्खं थिएटर हादरणार! तयार रहा, कारण हा पिक्चर एकदम झापुक झुपूक असणार! नाहीतर बुक्कीत टेंगुळ ..." त्याच्या या पोस्टवर चाहत्यांकडून आणि कलाकारांकडून शुभेच्छांचा वर्षाव होत आहे.

'झापुक झुपूक' चित्रपटाच्या पोस्टमध्ये पाहू शकतो की, सूरज बैलगाडी ओढत आहे. तर त्याच बैलगाडीवर बाकी सर्व कलाकार स्वार आहेत. सर्व कलाकारांच्या चेहऱ्यावर हसू आहे. यामुळे चित्रपटाची कहाणी जाणून घेण्यास चाहते आतुर आहेत. आपल्या अभिनय कौशल्याने प्रेक्षकांचे मनोरंजन करणारे उत्तम कलाकारांमुळे हा चित्रपट नक्कीच सिनेप्रेमींच्या पसंतीस उतरणार आहे. 'झापुक झुपूक' चित्रपट 25 एप्रिलला प्रेक्षकांच्या भेटीला येणार आहे.

'झापुक झुपूक' चित्रपटात 'प्रीतीचा वनवा उरी पेटला' मालिकेतील इंद्रनील कामत, हेमंत फरांदे, 'अबीर गुलाल' मालिकेतील पायल जाधव, 'तुमची मुलगी काय करते' मालिकेतील जुई भागवत आणि दीपाली पानसरे, तसेच पुष्कराज चिरपुटकर, मिलिंद गवळी हे कलाकार मुख्य भूमिकेत झळकणार आहेत. चित्रपटाच्या पोस्टरने चाहत्यांचे लक्ष वेधून घेतले आहे. चित्रपटाच्या दमदार टिझर आणि पोस्टरने सर्वांचे लक्ष वेधून घेतले आहे.