बिग बॉस मराठी पाचव्या पर्वाचा विजेता सूरज चव्हाण ठरला आहे. बिग बॉसच्या घरात यंदा १६ स्पर्धक सहभागी झाले होते. दरम्यान, ६ स्पर्धक फायनलिस्ट ठरले होते. यामध्ये कोकण हार्टेड गर्ल अंकिता वालावलकर, अभिनेत्री निक्की तांबोळी, गायक अभिजीत सांवत, डान्सर जान्हवी किल्लेकर, धनंजय पवार आणि रिलस्टार सूरज चव्हाण हे स्पर्धक होते. यामध्ये बारामतीच्या मातीतला सूरज चव्हाणने बिग बॉसच्या ट्रॉफीचा मान पटकवला.

सूरज चव्हाण बिग बॉस जिंकल्यानंतर राजकीय मंडळी, सामाजिक स्तरातून सर्वत्रच त्याचे अभिनंदन होत आहे. बिग बॉस फेम, अभिनेत्री निक्की तांबोळीने नुकतीच मुलाखतीत प्रतिक्रिया दिली आहे. निक्कीने सूरज चव्हाण विनर झाल्याने मी आनंदी असल्याचं म्हटलं आहे.

नुकत्याच दिलेल्या एका मुलाखतीत निक्कीने, "सूरज जिंकेल याची मला कल्पना नव्हती. पण जर चाहत्यांनी त्याला विजेता बनवलं असेल तर त्याला नाकारणारी मी कोण? जे तुमच्या नशिबात असतं तेच तुम्हाला मिळतं. कदाचित बिग बॉसची ट्रॉफी माझ्या नशिबात नव्हती. माझ्या नशिबात खूप सारं प्रेम होतं, जे मला मिळालं. त्यामुळे मी आनंदी आहे",

पुढे तिने, "सूरज सहानुभूतीच्या जोरावर ट्रॉफी जिंकला अशा कमेंट्स मी वाचल्या होत्या. पण जर मी ती ट्रॉफी उचलली असती तर माझ्या चाहत्यांनी माझा द्वेष केला असता. आता चाहते त्याचा द्वेष करत आहेत. हे चक्र असंच सुरू असतं. त्यामुळे सत्य स्वीकारून आयुष्यात पुढे जायचं असतं." असं म्हणाली.