मुबंई : बिग बॉस मराठी हा टिव्हीवरील एक लोकप्रिय रिअॅलिटी शो आहे. बिग बॉसच्या ४ च्या पर्वाला सुरूवात झाली आहे. दरवर्षीप्रमाणे यावर्षी सुद्धा बिग बॉसचे सूत्रसंचालन प्रसिद्ध दिग्दर्शक आणि अभिनेते महेश वामन मांजरेकर करत आहेत. बिग बॉस ४ हे पर्व 'ऑल इज वेल' या थीमवर आधारित आहे.

देवमाणूस फेम तेजस्विनी लोणारी, अभिनेता प्रसाद जवादे, अभिनेता डॉ. निखिल राजेशिर्के, मिसेस मुख्यमंत्री या कार्यक्रमातून मालिकांमध्ये पदार्पण करणारी अमृता धोंगडे, 'सातारी बाणा' म्हणजेच किरण माने, 'स्प्लिट्सविला' फेम समृद्धी जाधव, अक्षय केळकर, फायटर योगेश जाधव, पुण्याची 'टॉकर'वडी अमृता देशमुख, ऑटोराणी यशश्री मसुरकर, डान्सच्या दुनियेतला सुपरस्टार विकास सावंत, लावणीक्वीन मेघा घाडगे, प्रेक्षांमधील स्पर्धक त्रिशूल मराठे, अभिनेत्री रुचिरा जाधव आणि नृत्य दिग्दर्शक रोहित शिंदे हे स्पर्धक 'बिग बॉस मराठी'च्या चौथ्या पर्वात सहभागी झाले आहेत.

वादविवाद, मस्ती, टास्कचा थरार आणि प्रेम यासगळ्यांनी प्रेक्षकांना गुंतवून ठेवणारा कार्यक्रम म्हणजे 'बिग बॉस मराठी'. बिग बॉसचे चाहते नेहमीच या शोच्या प्रतीक्षेत असतात. चाहत्यांची ही प्रतीक्षा संपली आहे. एका घरातील १६ स्पर्धकांचा १०० दिवसांचा प्रवास सुरू झाला आहे. बिग बॉसचे चाहतेही मनोरंजनासाठी सज्ज झाले आहेत.