Update on Akanksha Dubey's Death Case: भोजपुरी अभिनेत्री आकांक्षा दुबेला आत्महत्येस प्रवृत्त केल्याचा आरोप असलेला गायक समर सिंग याला वाराणसी आयुक्तालयाच्या गुन्हे शाखेने गाझियाबाद येथून अटक केली आहे. त्याला कोर्टात हजर करून ट्रान्झिट रिमांडवर वाराणसीला नेण्याची तयारी सुरू आहे. त्याचबरोबर या प्रकरणातील दुसरा आरोपी संजय सिंग याचा शोध सुरू आहे.

भोजपुरी अभिनेत्री आकांक्षा दुबे हिला आत्महत्येस प्रवृत्त केल्याचा आरोप असलेल्या गायक समर सिंह आणि संजय सिंह यांच्याविरोधात न्यायालयाने गुरुवारी अजामीनपात्र वॉरंट (NBW) जारी केले.

दोन्ही आरोपींविरुद्ध अटक वॉरंट मिळावे, यासाठी आयुक्तालयाच्या पोलिसांच्या वतीने न्यायालयात अर्ज करण्यात आला होता. ज्यामध्ये आरोपी गायक समर सिंह याला अटक करण्यात आली आहे, तर पोलीस दुसरा आरोपी संजय सिंहचा शोध घेत आहेत.

भोजपुरी अभिनेत्री आकांक्षा दुबे 26 मार्च रोजी सारनाथ भागातील एका हॉटेलच्या खोलीत मृतावस्थेत आढळून आली होती. 27 मार्च रोजी आकांक्षा दुबे हिला आत्महत्येस प्रवृत्त केल्याप्रकरणी भोजपुरी गायक समर सिंह आणि त्याचा भाऊ संजय सिंह यांच्याविरुद्ध सारनाथ पोलिस ठाण्यात गुन्हा दाखल करण्यात आला होता.

आकांक्षा दुबे ही भडोहीच्या चौरी पोलीस स्टेशन हद्दीतील पारसीपूर येथील रहिवासी होती. या प्रकरणी आकांक्षा दुबेच्या कुटुंबीयांच्या वकिलाने वाराणसी पोलिसांना पोस्टमॉर्टमबाबत अनेक प्रश्न विचारले आहेत.

पोलिसांनी दावा केला होता की आकांक्षा दुबे मृत्यूपूर्वी दारू प्यायली होती, तर पोस्टमार्टम रिपोर्टमध्ये त्याचा उल्लेखही नव्हता. अहवालात आकांक्षाच्या पोटात तपकिरी रंगाचे रसायन आढळले आहे.

वकिलाने सांगितले की, पोस्टमॉर्टम रिपोर्टमध्ये आकांक्षाच्या हातावर झालेल्या दुखापतीचा उल्लेख आहे, तर पोलिसांनी त्यांच्या अहवालात त्याचा उल्लेखही केलेला नाही.