A.R. Rahman Case: "पोन्नियिन सेल्वन २" चित्रपटातील "वीरा राजा वीरा" या गाण्याशी संबंधित कॉपीराइट प्रकरणात दिल्ली उच्च न्यायालयाने संगीतकार ए.आर. रहमान यांना दिलासा दिला आहे. न्यायालयाने रहमान आणि चित्रपट निर्मात्यांना गाण्याचे श्रेय बदलण्याचे आणि २ कोटी रुपये जमा करण्याचे निर्देश देणारा एकल न्यायाधीशाचा आदेश रद्द केला.

कॉपीराइट उल्लंघन खटला

पद्मश्री पुरस्कार विजेते भारतीय शास्त्रीय गायक फैयाज वसिफुद्दीन डागर यांनी एकल न्यायाधीशासमोर कॉपीराइट उल्लंघन खटला दाखल केला होता, त्यामध्ये आरोप करण्यात आला होता की हे गाणे त्यांचे वडील नासिर फैयाजुद्दीन डागर आणि काका झहीरुद्दीन डागर यांनी रचलेल्या शिव स्तुती गाण्यावरून कॉपी केले आहे.

ए.आर. रहमान यांनी या निर्णयाला आव्हान दिले

यापूर्वी, एकलपीठाने रहमान आणि चित्रपटाचे निर्माते, मद्रास टॉकीज आणि लायका प्रॉडक्शन्स यांना या गाण्यासाठी न्यायालयात २ कोटी रुपये जमा करण्याचे आणि गाण्याच्या श्रेयांमध्ये दिवंगत संगीतकार नासिर फय्याजुद्दीन डागर आणि नासिर जहिरुद्दीन डागर यांची नावे समाविष्ट करण्याचे आदेश दिले होते.

रहमान यांनी या निर्णयाला आव्हान दिले होते. आता,न्यायमूर्ती सी. हरि शंकर आणि ओम प्रकाश शुक्ला यांच्या खंडपीठाने एकलपीठाचा आदेश रद्द केला आहे. दिल्ली उच्च न्यायालयाने स्पष्टपणे सांगितले की वादग्रस्त आदेश लागू केला जाणार नाही. न्यायालयाने म्हटले की एकलपीठाचा आदेश आदेश तत्वतः रद्द करण्यात यावा. कारण या निर्णयात एकलपीठाने कॉपीराइट उल्लंघनाच्या पैलूवर कोणतेही मत व्यक्त केले नाही.