Amey Wagh Movie: डिजिटल मनोरंजनविश्वात आपल्या दर्जेदार आणि प्रेक्षकांच्या मनाला भिडणाऱ्या कथांसाठी ओळखल्या जाणाऱ्या द व्हायरल फीव्हर अर्थात टीव्हीएफने आता मराठी मनोरंजनविश्वात दमदार पाऊल टाकले आहे. टीव्हीएफने आपल्या पहिल्या मराठी चित्रपटाची घोषणा केली असून ‘बायंगी : पळायची नाही, टाळायची!’ या चित्रपटातून मराठी प्रेक्षकांच्या भेटीला येणार आहे. या चित्रपटात अभिनेता अमेय वाघ प्रमुख भूमिकेत झळकणार आहे.
अलौकिक लोककथांच्या जगातून एक रंजक आणि मनोरंजक कथा प्रेक्षकांसमोर मांडण्याचा प्रयत्न या चित्रपटातून करण्यात आला आहे. त्यामुळे टीव्हीएफच्या या मराठी पदार्पणाची प्रेक्षकांमध्ये उत्सुकता निर्माण झाली आहे. विनोद, मनोरंजन आणि भन्नाट कथानकाचा अनुभव या चित्रपटातून मिळण्याची शक्यता आहे.
‘बायंगी : पळायची नाही, टाळायची!’ या चित्रपटाचे दिग्दर्शन अभय राऊत यांनी केले आहे. अभय राऊत यांनी ‘गुल्लक’च्या पाचव्या सीझनचे दिग्दर्शन केले आहे. त्यामुळे त्यांच्या दिग्दर्शनाखाली तयार होणाऱ्या या मराठी चित्रपटाकडे विशेष लक्ष लागले आहे.
अमेय वाघसोबत या चित्रपटात हार्दिक जोशी, मनमीत पेम आणि अविनाश खेडेकर यांच्याही महत्त्वाच्या भूमिका पाहायला मिळणार आहेत. दमदार कलाकारांची फळी आणि टीव्हीएफची कथाकथनाची खास शैली यामुळे हा चित्रपट प्रेक्षकांसाठी वेगळा अनुभव ठरण्याची शक्यता आहे.
गेल्या अनेक वर्षांपासून टीव्हीएफने भारतीय प्रेक्षकांना जवळच्या वाटणाऱ्या आणि प्रभावी आशयाच्या वेब सीरिज दिल्या आहेत. ‘पंचायत’, ‘गुल्लक’, ‘कोटा फॅक्टरी’, ‘अॅस्पिरंट्स’, ‘टीव्हीएफ पिचर्स’, ‘ये मेरी फॅमिली’, ‘क्युबिकल्स’ आणि ‘पर्मनंट रूममेट्स’ यांसारख्या मालिकांनी मोठी लोकप्रियता मिळवली आहे.
२०२६ मध्येही टीव्हीएफचे अनेक शो प्रेक्षकांच्या भेटीला आले आहेत. यामध्ये सोनी लिव्हवरील ‘गुल्लक सीझन ५’, अॅमेझॉन प्राइम व्हिडिओवरील ‘सप्ने व्हर्सेस एव्हरीवन सीझन २’ आणि ‘अॅस्पिरंट्स सीझन ३’, नेटफ्लिक्सवरील ‘हॅलो बच्चो सीझन १’ तसेच जिओहॉटस्टारवरील ‘स्पेस जेन : चांद्रयान सीझन १’ यांचा समावेश आहे.
२०१२ मध्ये अरुणाभ कुमार यांनी स्थापन केलेल्या टीव्हीएफने डिजिटल कंटेंटच्या माध्यमातून भारतीय मनोरंजनविश्वात स्वतःची वेगळी ओळख निर्माण केली आहे. आता तमिळ, तेलुगू आणि मराठी भाषांमधील आशय निर्मितीवरही टीव्हीएफने भर दिला आहे. त्यामुळे ‘बायंगी : पळायची नाही, टाळायची!’ हा चित्रपट टीव्हीएफच्या मराठी प्रवासाची महत्त्वाची सुरुवात ठरणार आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.