Oshiwara Police Station:

अभिनेत्रीने चित्रपट निर्मात्याविरोधात (Film Producer) पोलिस ठाण्यामध्ये तक्रार दाखल केल्याची घटना समोर आली आहे. अनोळखी व्यक्तीला फोन नंबर देऊन बदनामी केल्याचा आरोप या अभिनेत्रीने निर्मात्यावर केला आहे. या अभिनेत्रीला सतत अज्ञात व्यक्तीकडून फोन येत आहेत. या त्रासाला कंटाळून शेवटी या प्रकरणी अभिनेत्रीने ओशिवरा पोलिस ठाण्यात (Oshiwara Police Station) धाव घेत निर्मात्याविरोधात तक्रार दाखल केली आहे.

मिळालेल्या माहितीनुसार, ही अभिनेत्री जोगेश्वरी येथे राहते. २०१८ मध्ये तिची एका चित्रपट निर्मात्यासोबत ओळख झाली होती. मे २०२३ मध्ये या निर्मात्याने अभिनेत्रीकडून ४००० रुपये उसने घेतले होते. पण दुसऱ्याच दिवशी त्याने ते परत केले. त्यानंतर जूनल २०२३ मध्ये त्याने परत तिच्याकडून ७,५०० रुपये उसने घेतले. पण हे पैसे त्याने अभिनेत्रीला परत दिलेच नाही. आपले उसने पैसे परत करावे यासाठी अभिनेत्री निर्मात्याला वारंवार फोन करत होते. पण तो फोन उचलत नव्हता.

आपले उसने घेतलेले पैसे परत न मिळाल्यामुळे अभिनेत्रीने १९ फेब्रुवारीला फेसबुकवर स्टोरी शेअर केली होती. या फेसबुक स्टोरीनंतर चित्रपट निर्मात्याने अभिनेत्रीला तिचे फोटो पॉर्नवेबस्टाईटवर अपलोड करण्याची धमकी दिली. त्यानंतर अभिनेत्रीला वारंवार अज्ञात व्यक्तीकडून फोन येऊ लागले. सतत येणाऱ्या फोनमुळे ही अभिनेत्री वैतागली आणि शेवटी तिने ओशिवरा पोलिस ठाण्यात धाव घेतली. याप्रकरणी तिने चित्रपट निर्मात्याविरोधात पोलिसात तक्रार दाखल केली आहे.