साक्षी यादव, मुंबई

अभिनेता टायगर श्रॉफशी संबंधित गोळीबार प्रकरणाच्या तपासात पोलिसांनी न्यायालयात महत्त्वाची माहिती सादर केली आहे. या गुन्ह्यात सहभागी असलेल्या आरोपींचे दोन वेगवेगळे ग्रुप काम करत होते. एका ग्रुपकडे गोळीबार करण्याची जबाबदारी होती, तर दुसरा ग्रुप शस्त्रांची व्यवस्था करणे, ती शूटरपर्यंत पोहोचवणे आणि इतर आवश्यक मदत पुरवण्याचे काम करत होता, असा खुलासा पोलिसांनी न्यायालयात केला.

विशेष सरकारी वकिलांनी दिलेल्या माहितीनुसार, या प्रकरणातील सहा आरोपी शस्त्रे मिळवून ती गोळीबार करणाऱ्या व्यक्तीपर्यंत पोहोचवत होते. तर उर्वरित आरोपी मुंबईतील विविध ठिकाणी रेकी करून गोळीबाराच्या कटासाठी मदत करत होते. या संपूर्ण टोळीचे नेतृत्व अनिल पंडित करत असल्याचा दावा सरकारी पक्षाने न्यायालयात केला आहे.

तपासादरम्यान आरोपी एकमेकांच्या संपर्कात राहण्यासाठी डिजिटल ॲपचा वापर करत असल्याचे समोर आले आहे. पोलिसांनी आरोपींचे मोबाईल फोन तपासले असता त्यामध्ये व्हॉट्सॲप चॅट, व्हॉइस नोट्स आणि व्हिडिओ क्लिप्स मिळाल्याची माहिती न्यायालयाला देण्यात आली. या डिजिटल पुराव्यांच्या आधारे कटातील प्रत्येक आरोपीची भूमिका निश्चित करण्याचा प्रयत्न सुरू आहे. या गुन्ह्यासाठी लागणारा पैसा कुठून उपलब्ध झाला, आर्थिक व्यवहार कोणी केले आणि आणखी कोणाचा या प्रकरणात सहभाग आहे, याचा सखोल तपास करणे आवश्यक असल्याचे पोलिसांनी सांगितले. काही आरोपींनी तपासादरम्यान बनावट आधार कार्ड सादर केले असावेत, असाही पोलिसांना संशय आहे.

दरम्यान, विशेष मकोका न्यायालयाने या प्रकरणातील सर्व ११ आरोपींना ६ नोव्हेंबरपर्यंत पोलीस कोठडी सुनावली आहे. तसेच हरियाणातील सोनीपतमधून आणखी एका संशयिताला ताब्यात घेण्यात आले आहे. आरोपींना पैसे मिळवून देण्यासाठी त्याने बँक खात्याचा तपशील पुरवल्याचा पोलिसांना संशय आहे. दुसरीकडे, या गोळीबारात जखमी झालेले उमेश चौहान यांना ११ दिवसांच्या उपचारानंतर मुंबईतील केईएम रुग्णालयातून डिस्चार्ज देण्यात आला आहे.