मनोरंजन विश्वातून आनंदाची बातमी समोर आली आहे. प्रसिद्ध अभिनेत्याची तब्बल १२ वर्षांनी टिव्हीवर धमाकेदार एन्ट्री होत आहे. 'झी मराठी' वाहिनीवर पुन्हा एकदा हा अभिनेता प्रेक्षकांचे मनोरंजन करण्यासाठी येत आहे. प्रेक्षकांचा लाडका सत्यजित पुन्हा एकदा भेटीला येत आहे. सत्यजित नाव ऐकताच आठवते ते म्हणजे 'तू तिथे मी' ही मालिका. या मालिकेतील सत्यजित-मंजिरीची जोडी आजही प्रेक्षकांच्या लक्षात आहे.

'तू तिथे मी' मालिकेत सत्यजितच्या भूमिकेत मराठी अभिनेता चिन्मय मांडलेकरने साकारली होती. तर मंजिरीच्या भूमिकेत मृणाल दुसानिस झळकली होती. आता पुन्हा एकदा १२ वर्षांनतर चिन्मय मांडलेकर मालिका विश्वात येत आहे. नुकताच याचा एक खास प्रोमो समोर आला आहे. चिन्मय मांडलेकर आता 'सनई चौघडे' या मालिकेत दिसणार आहे. या मालिकेत देखील त्याच्या भूमिकेचे नाव सत्यजित असेच आहे.

'झी मराठी' ने शेअर केलेल्या व्हिडीओमध्ये चिन्मय मांडलेकरची एक झलक पाहायला मिळत आहे. या व्हिडीओला त्यांनी हटके कॅप्शन दिले आहे. त्यांनी लिहिलं की, "अगदी योग्य मुहूर्तावर होणार सत्यजितची दणक्यात एंट्री!" या व्हिडीओवर चाहते भरभरून कमेंट्स करताना दिसत आहेत. व्हिडीओत चिन्मय मांडलेकरचा एक डॅशिंग लूक पाहायला मिळत आहे.

'सनई चौघडे' मालिकेत शर्वरी नवीन जॉब शोधत आहे. त्यामुळे सत्यजित तिचा बॉस असू शकतो, अशी चर्चा सोशल मीडियावर रंगली आहे. मात्र अद्याप कोणतीच गोष्ट स्पष्ट झाली नाही. सनई चौघडे ही मालिका झी मराठी वाहिनीवर संध्याकाळी 8.30 वाजता पाहायला मिळते.