संजय राठोड, यवतमाळ

Yavatmal Youth Aatish Deshmukh Murder News पुण्यात प्रेमप्रकरणातून तरुणाची हत्या केल्याची घटना ताजी असतानाच यवतमाळमध्ये देखील एका तरुणाची प्रेमप्रकरणातून हत्या करण्यात आली आहे. अवघ्या २४ तासांमध्ये पोलिसांनी या हत्येचा शोध लावून दोघांना ताब्यात घेतले आहे. याप्रकरणी दोन्ही आरोपींविरोधात गुन्हा दाखल करण्यात आला असून पुढील तपास सुरु आहे.

मिळालेल्या माहितीनुसार, यवतमाळच्या लाडखेड पोलीस हद्दीतील वाघापुर शेतशिवारात एका तरुणाचा मृतदेह सापडला होता. याप्रकरणी नागरिकांनी पोलिसांत माहिती दिली होती. पोलिसांनी घटनास्थळी पंचनामा करून तातडीने तपासाची चक्रे वेगाने फिरवली. या तपासात मृतक आतिश देशमुख याची हत्या प्रेमसंबंधातून झाल्याचे समोर आले आहे.

आरोपी महिला व मृतक यांच्यातील संबंधांमुळे घरगुती वाद वाढत होते. सततचा त्रास, वाद आणि धमक्यांमुळे संतप्त झालेल्या पती-पत्नीने संगनमत करून आतिश देशमुख याची निर्घृण हत्या केल्याची कबुली दिली आहे.

घटनेच्या दिवशी आरोपींनी चाकू व दगडाच्या सहाय्याने त्याच्यावर हल्ला करून त्याचा खून केला व मृतदेह शेतशिवारात टाकून दिला.पोलीसांनी वेगाने तपास करत आरोपींपर्यंत पोहोचून त्यांना अटक केली.या जलद कारवाईमुळे स्थानिक गुन्हे शाखेचे कौतुक होत असून पुढील तपास सुरू आहे.