उत्तर प्रदेशातील प्रतापगड येथे गावचा माजी सरपंच आणि १८ मुलांच्या वडिलांची निर्घृणपणे हत्या करण्यात आल्याची धक्कादायक घटना घडली आहे. चार दिवसांपासून बेपत्ता असलेल्या सरपंचाचा रविवारी २२ मार्च रोजी मृतदेह सापडला. पोलीस तपासात सरपंचाच्या गर्लफ्रेंडनेच त्याची हत्या केल्याचे उघड झाले असून अनेक धागे दोरे पोलिसांच्या हाती लागले.

मिळालेल्या माहितीनुसार, मृत सरपंचाचे नाव गुलहसन उर्फ ​​मुन्ना असे आहे. ते मिश्रपूर मुस्तर्का गावचे माजी सरपंच होते. त्यांना दोन पत्नी असून त्यांच्यापासून त्यांना १८ मुलं आहेत. मात्र गुलहसनचे सुमन देवी नावाच्या महिलेसोबत बऱ्याच काळापासून प्रेमसंबंध होते. सुमनने म्हटले की, गुलहसन तिला सतत ब्लॅकमेल करत होता आणि भेटण्यासाठी तिच्यावर दबाव टाकत होता.

या त्रासाला कंटाळून सुमनने १८ मार्च रोजी गुलहसनला भेटण्याच्या बहाण्याने जेटवाडा येथील बागियापूरमध्ये बोलावले. सुमनचा भाऊ आणि त्याचा मित्र तिथे आधीच वाट पाहत होते. गुलहसन येताच सुमनच्या भावाने गुलहसनच्या डोक्यात लोखंडी सळीने वार करून हत्या केली.

त्याची ओळख लपवण्यासाठी मृतदेह एका पोत्यात कोंबून शारदा नदीच्या कालव्यात फेकून देण्यात आला. मात्र गुलहसन चार दिवसांपासून बेपत्ता असल्याने त्याच्या पत्नीने तक्रार दाखल केली. या तक्रारीनंतर पोलीस तपासाला वेग आला आणि पोलिसांनी हत्ये मागच्या खऱ्या सूत्रधाराचा चेहरा समोर आणला. दरम्यान सुमनला पोलिसांनी बेड्या ठोकल्या आहेत.