संघर्ष गांगुर्डे, कल्याण डोंबिवली

कल्याण डोंबिवलीत दिवाळी सणामध्ये अनेक गुन्हेगारीच्या घटना घडल्या. या गुन्हेगारीला वेळीच आळा घालण्यासाठी पोलिसांनी मध्यरात्री मार्च काढला. शिवाय टवाळखोरांना कारवाईचा सक्त इशारा दिला. पोलिसांनी दाखवलेल्या खाकी बडग्यानंतरही कल्याणमध्ये दोन गटात फटाके लावण्याच्या किरकोळ वादातून तुफान हाणामारी झाल्याचं पाहायला मिळालं. या घटनेचा व्हिडिओ सध्या सोशल मीडियावर व्हायरल झाला असून परिसरात एकच खळबळ उडाली आहे.

मिळालेल्या माहितीनुसार, कल्याण परिसरात छठ पूजेदरम्यान दोन्ही गटातील तरुणांमध्ये फटाके लावण्यावरून किरकोळ वाद झाला. या वादात शब्दाला शब्द वाढत गेला. हमरीतुमरीचा हा वाद काही क्षणांतच इतका उग्र झाला की दोन्ही गटांनी एकमेकांच्या अंगावर धावून जात हाणामारी केली. उपस्थित नागरिकांनी मध्यस्थी करण्याचा प्रयत्न केला मात्र त्यात त्यांना यश आले नाही.

आजूबाजूच्या नागरिकांनी यासंदर्भांत पोलिसांना पाचारण केले. घटनेची माहिती मिळताच पोलीस तात्काळ घटनास्थळी दाखल झाले आणि परिस्थिती नियंत्रणात आणली. सध्या पोलिसांनी व्हिडिओच्या आधारे हाणामारीत सहभागी असलेल्या तरुणांचा शोध सुरू केला आहे. या घटनेमुळे उत्सवाच्या वातावरणात काही काळ तणावाचे वातावरण निर्माण झाले होते.

या घटनेप्रकरणी पोलिसांनी नागरिकांना सण-उत्सव शांततेत साजरे करण्याचे आवाहन केले असून, वाद निर्माण करणाऱ्यांवर कठोर कारवाई करण्यात येईल, असेही स्पष्ट केले आहे. दरम्यान नागरिकांनी या घटनेनंतर सुरक्षितेवर प्रश्न उपस्थित केले आहेत. या घटनेतील तरुणांना अद्दल घडेल का ? हे पाहणं महत्त्वाचं ठरेल