जालन्यातील छत्रपती संभाजी नगर रोडवरील चंदनझिरा परिसरात असलेल्या टोलनाका येथे कारमधून आलेल्या अज्ञात आरोपीकडून ट्रक चालकावर गोळीबार झाल्याची घटना घडली आहे. गोळीबाराची घटना सीसीटीव्ही मध्ये कैद झाली असून जुन्या वादातून गोळीबार झाल्याची प्राथमिक माहिती मिळत आहे.

या गोळीबारामध्ये मुंबई येथील राहणारा मोहम्मद रिजवान असामुद्दिन याच्या कंबरेला गोळी लागली गेल्याने तो जखमी झाला आहे. त्याला उपचारासाठी जालना सामान्य रुग्णालयात दाखल करण्यात आले आहे. दरम्यान घटनास्थळी जालन्याचे अपर पोलीस अधीक्षक आयुष नोपणी यांनी भेट दिली असून याप्रकरणी अधिक तपास पोलीस करत आहे.

जालन्यातील चंदनझिरा पोलीस ठाण्यात गुन्हा दाखल

जालन्यातील छत्रपती संभाजी नगर रोडवरील टोलनाक्याजवळ काल रात्री ट्रक चालकावर चारचाकी गाडीतून आलेल्या अज्ञाताने गोळीबार केला होता. यात मुंबईतील राहणारा मोहम्मद रिजवान असामुद्दिन हा ट्रक चालक गंभीर जखमी झाला असून त्याच्यावर जालन्यातील सामान्य रुग्णालयात उपचार सुरू आहे. दरम्यान जखमीच्या फिर्यादीवरून जालन्यातील चंदनझिरा पोलीस ठाण्यामध्ये आरोपींविरोधात खुनाचा प्रयत्न केल्याप्रकरणी गुन्हा दाखल करण्यात आला आहे.

हल्लेखोर आणि जखमी दोघेही मुंबईचे

मिळालेल्या माहितीनुसार, ट्रकचालक आणि त्याच्यावर हल्ला करणारे दोघेही मुंबईचे रहिवासी आहे. ट्रक चालक जालन्यातील छत्रपती संभाजी नगर रोडवरील टोलनाक्याजवळ एका हॉटेलवर चहापाणीसाठी थांबला असता पाठीमागून येणाऱ्या चार चाकी गाडीतून उतरून त्याच्यावर गोळीबार करण्यात आला आहे. दरम्यान जखमी आणि त्याच्यावर गोळीबार करणारे दोघेही मुंबईचे राहणार असल्याची माहिती समोर आली आहे.

जुन्या वादातून गोळीबार

जालन्यात काल रात्री गोळीबार झाल्याने जिल्ह्यात एकच खळबळ उडाली होती. मात्र गोळीबार करणारा आणि ज्याच्यावर गोळीबार झाला तो दोघेही मुंबईचे राहणारे आहे. दरम्यान जुन्या आर्थिक वादातून हा गोळीबार झाल्याचा संशय पोलिसांना आहे .याप्रकरणी जालन्यातील चंदनझिरा पोलीस ठाण्यामध्ये गुन्हा दाखल करण्यात आला असून अधिकचा तपास पोलीस करत आहेत.

Edited By : Akshay Shinde